Saılaý-2023: Eń jas kandıdat ta, eń egde kandıdat ta Almatyda turady

ASTANA. QazAqparat – Ortalyq saılaý komıssııasy tóraǵasynyń orynbasary Konstantın Petrovtyń aıtýynsha aldaǵy saılaýǵa kandıdatýrasyn usynǵan úmitkerlerdiń orta jasy 50-den aspaıdy, dep habarlaıdy QazAqparat tilshisi.

«Ózderińiz biletindeı, Parlament Májilisi 98 depýtattan turady, onyń 29-y bir mandatty aýmaqtyq okrýgter boıynsha saılanady. Óńirlerden alǵan málimetter boınysha 29 bir mandatty okrýg boıynsha 609 kandıdat usynyldy. Onyń 84-in qoǵamdyq birlestikter men saıası partııalar usynsa, 525-i nemese 86,2%-y ózin-ózi usynǵan», - dedi OSK tóraǵasynyń orynbasary komıssııanyń kezekti otyrysynda.

Onyń málimeti boıynsha birmandatty júıe boıynsha kandıdatýrasy usynylǵandardyń 80%-y erler, 20%-y áıel.

«Úmitkerlerdiń ortasha jasy 50-den tómen. Eń jas kandıdat ta, eń eresek kandıdat ta Almaty qalasynda turady. Kandıdattardyń arasynda 10 ulttyń ókili bar», - dedi Konstantın Petrov.

Eske salsaq, keshe Májilis pen máslıhat saılaýynyń úgit-nasıhat kezeńi bastaldy.

Sondaı-aq, keshe Ortalyq saılaý komıssııasy partııalardyń ataýlary saılaý bıýleteninde qandaı tártippen ornalasatynyn jerebe arqyly anyqtaǵan bolatyn.