Saılaý-2023: BAQ-qa 10 myńǵa jýyq úgit-nasıhat materıaly jarııalandy

ASTANA. QazAqparat - Aqparat jáne qoǵamdyq damý vıtse-mınıstri Qanat Ysqaqov saılaýaldy úgit-nasıhat naýqany kezinde BAQ betterine jarııalanǵan materıaldardyń qorytyndysymen tanystyrdy, dep habarlaıdy QazAqparat tilshisi.

«Saılaýaldy naýqanyna qatysty bizdiń mınıstrlik aldyna úsh mindet qoıdy. Aldymen saıası partııalar men saılaý aldyndaǵy jarysqa qatysýshylarǵa úgit-nasıhat jumysyn júrgizý úshin teń jaǵdaı jasaý. Ekinshiden, aqparattyq túsindirý jumystaryn keńinen júrgizý. Úshinshiden, BAQ pen onlaın-platformalardy paıdalanýda zańnama talaptarynyń saqtalýyn qamtamasyz etý. Osy mindetterdi sheshý úshin mınıstrlik aqparattyq keńistikke turaqty monıtorıng júrgizdi», - dedi Qanat Ysqaqov Ortalyq saılaý komıssııasynyń otyrysynda.

Vıtse-mınıstr keltirgen derekke sáıkes, 18 aqpannan bastap búgingi kúnge deıin monıtorıng júrgizý barysynda 576 respýblıkalyq jáne óńirlik BAQ, onyń ishinde 48 telearna, 386 gazet jáne 142 ınternet-resýrs qamtyldy.

Aıtýynsha, mınıstrlik aqparat keńistiginiń 95-96%-n qamtydy.

«Monıtorıng qorytyndysy boıynsha úgit-nasıhat naýqany kezinde BAQ-ta saıası partııalar men saılaýaldy shtabtardyń qyzmetine arnalǵan 10 myńǵa jýyq materıal jarııalandy. Onyń ishinde 5 myńnan astamy teledıdarda, 2,5 myńǵa jýyǵy baspa basylymdarynda jáne 2,5 myńy ınternet – resýrstarda», - deıdi ol.