Saılaý-2022: ShYU mıssııasynyń baıqaýshylary jumysyn bastady

ASTANA. QazAqparat – ShYU mıssııasy 20 qarasha kúni ótetin kezekten tys prezıdent saılaýyn qadaǵalaıdy, dep habarlaıdy QazAqparat tilshisi.

«Qazir ǵana QR Ortalyq saılaý komıssııasynyń tóraǵasy Nurlan Ábdirovpen kezdestim. Bul Qazaqstannyń kezekten tys prezıdent saılaýynda mıssııa baıqaýshylarynyń búginnen bastap jumysqa kiriskenin bildiredi. Qazaqstan - ShYU-ǵa múshe memleket. Biz Qazaqstan tarapynan shaqyrtý alyp, múshe memleketterdiń barlyǵyna saýal joldap, bárinen qoldaý aldyq. Quramynda 18 baıqaýshy bar mıssııaǵa ózim basshylyq jasaımyn», - dedi ShYU mıssııasynyń basshysy Chjan Mın búgin OSK-degi brıfıng barysynda.

Onyń dereginshe, mısssııa quramynda ShYU-ǵa múshe memleketterdiń zań shyǵarýshylyq, atqarýshylyq jáne saılaý organdarynyń ókilderi, ShYU hatshylyǵynyń laýazymdy tulǵalary bar.

«Baıqaýshylar mıssııasynyń músheleri qyzmetin saıası shynaıylyq, beıtaraptylyq jáne ishki iske aralaspaý ustanymdaryn basshylyqqa ala otyryp, derbes ári táýelsiz júrgizedi. Mıssııamyzdy ádil ári adal atqaratyn bolamyz. Qazaqstan halqyn jarqyn bolashaq kútip tur dep esepteımiz. Osyǵan oraı Qazaqstannyń ádil, tıimdi saıası protsesterin qamtamasyz etý úshin bizge baılanysty jaıttyń bárin jasaımyz. Aldaǵy kúnderi mıssııa músheleri Astana qalasy men Aqmola oblystaryndaǵy saılaý ýchaskelerin aralaıtyn bolady», - dedi mıssııa basshysy.