Saılaý-2022: OSK shet elderdegi 68 saılaý ýchaskesiniń qyzmetkerlerin oqytady
«Ortalyq saılaý komıssııasy dástúrli túrde saılaý protsesine qatysýshylardy oqytý máselesine jiti kóńil bóledi. Máselen, biz saıası partııalarǵa, múgedektigi bar adamdarǵa, jastarǵa, BAQ jáne ÚEU ókilderine arnalǵan oqytý semınarlaryn ótkizdik. Ortalyq saılaý komıssııasy Qazaqstannan tys jerlerde saılaý ótkizýdi qamtamasyz etetin 68 ýchaskelik saılaý komıssııalarynyń músheleri úshin oqytý semınaryn ótkizedi», - dedi Nurlan Ábdirov sheteldik dıplomatııalyq korpýs ókilderine arnalǵan brıfıngte.
Sonymen birge, spıker qyrkúıek aıynda Ortalyq saılaý komıssııasy janynan saılaý protsesiniń ózekti máselelerine jastardyń nazaryn aýdarý, olardyń saılaý belsendiligi men quqyqtyq mádenıetin arttyrý maqsatynda Jas saılaýshylar klýby qurylǵanyn habarlady.
Spıkerdiń aıtýynsha, QR OSK múgedektigi bar adamdardyń daýys berýine qajetti jaǵdaı jasaýǵa erekshe kóńil bóledi. Atap aıtqanda, ınvataksı, sýrdoaýdarma, taktıldi joldar men Braıl trafaretin qoljetimdi etý jóninde jergilikti komıssııalarǵa tapsyrmalar berilgen.
«Ortalyq saılaý komıssııasy janynan múgedektigi bar adamdardyń saılaý quqyqtaryn qamtamasyz etý jónindegi jumys toby quryldy jáne belsendi jumys isteıdi, onyń quramynda múgedek azamattardyń quqyqtaryn qorǵaý jónindegi bedeldi respýblıkalyq jáne óńirlik birlestikterdiń ókilderi bar», - dep tolyqtyrdy Nurlan Ábdirov.
Aıta keteıik, QR Premer-Mınıstriniń orynbasary – Syrtqy ister mınıstri Muhtar Tileýberdi men Ortalyq saılaý komıssııasynyń tóraǵasy Nurlan Ábdirov sheteldik dıplomatııalyq korpýs ókilderine aldaǵy Prezıdent saılaýyna daıyndyq týraly baspasóz máslıhatyn ótkizdi.
Prezıdenttik saılaýǵa 10 101 ýchaske ázirlendi, onyń ishinde 53 elde 68 saılaý ýchaskesi quryldy. Saılaýshylar tizimine 11 mıllıonnan astam qazaqstandyq endi.