Saılaý-2022: Nurlan Áýesbaev Aqtóbedegi problemalyq turǵyn úılerdi aralady

ASTANA. QazAqparat – Jalpyulttyq sotsıal-demokratııalyq partııa atynan prezıdenttikke kandıdat Nurlan Áýesbaev Aqtóbedegi problemalyq turǵyn úı alaptary boıynsha reıdke qatysty. Bul týraly kandıdat áleýmettik jelidegi paraqshasynda jazdy.

Aıta keteıik, buǵan deıin prezıdenttikke kandıdat Nurlan Áýesbaev saılaýaldy úgit-nasıhat jumysyn Aqtóbe oblysy Alǵa aýdany Bestamaq aýylynan bastaǵanyn jazǵan edik.

Jalpyulttyq sotsıal-demokratııalyq partııanyń habarlaýynsha, Almatydaǵy saýda oıyn-saýyq ortalyqtarynda QR prezıdenttigine úmitker Nurlan Áýesbaevty qoldaý jónindegi Respýblıkalyq saılaýaldy shtab belsendileri úgit-nasıhat materıaldaryn taratty.

Eske salaıyq, saılaý aldyndaǵy úgit-nasıhat 2022 jylǵy 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady. 19 qarasha – respýblıka boıynsha tynyshtyq kúni. Al, 20 qarashada Prezıdent saılaýy ótedi.

Ortalyq saılaý komıssııasy alty adamdy prezıdenttikten úmitker retinde tirkedi. Olar – Qazaqstan Respýblıkasynyń qazirgi Prezıdenti Qasym-Jomart Toqaev, «Zamanaýı qoǵamdy zertteý ınstıtýty» JShS dırektory Meıram Qajyken, «Qazaqstan fermerler odaǵy» qaýymdastyǵynyń prezıdenti Jıgýlı Daırabaev, Astana qalasy máslıhatynyń VI shaqyrylymynyń depýtaty, Astana ákiminiń áleýmettik máseleler jónindegi shtattan tys keńesshisi Qaraqat Ábden, «Otbasyndaǵy zorlyq-zombylyqsyz Qazaqstan» jobasynyń negizin qalaýshy Saltanat Tursynbekova, Jalpyulttyq sotsıal-demokratııalyq partııasy Astana qalalyq fılıalynyń tóraǵasy Nurlan Áýesbaev.