Saılaý-2022: Meıram Qajyken Óskemenge bardy

ÓSKEMEN. QazAqparat – QR prezıdenttigine kandıdat Meıram Qajyken Óskemen qalasyna baryp, Shyǵys Qazaqstan aýrýhanasy dıagnostıkalyq ortalyǵynyń qyzmetkerlerimen kezdesti. Bul týraly QazAqparat kandıdattyń Shtabyna silteme jasaı otyryp habarlaıdy.

Kandıdat jınalǵandarǵa óziniń saılaýaldy baǵdarlamasy jaıly aıtyp berdi. Sodan soń aq halattylar ózderin tolǵandyrǵan suraqtaryn qoıdy.

Aıta ketsek, oblystyq aýrýhana 1889 jyly ashylǵan. Qazirgi ýaqytta munda 1000-ǵa jýyq adam jumys isteıdi. Oblystyq aýrýhananyń quramyna 6 zerthana, 12 klınıkalyq jáne 7 paraklınıkalyq bólimshe, onyń ishinde óńirdegi jalǵyz keýde jáne tamyr hırýrgııasy, proktologııa, kóz mıkrohırýrgııasy, ortopedııa bólimsheleri kiredi.

Buǵan deıin Meıram Qajyken úgit-nasıhat naýqany aıasynda Semeı medıtsınalyq ýnıversıtetinde bolǵanyn jazǵan edik.

Esterińizge sala keteıik, saılaý aldyndaǵy úgit-nasıhat 2022 jylǵy 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady. 19 qarasha – respýblıka boıynsha tynyshtyq kúni. Al, 20 qarashada Prezıdent saılaýy ótedi.