Saılaý-2022: Meıram Qajyken Mańǵystaý oblysyna bardy

AQTAÝ. QazAqparat – QR prezıdenttigine kandıdat Meıram Qajyken Mańǵystaý oblysynyń kásipodaq ókilderi jáne qoǵam qaıratkerlerimen kezdesti, dep habarlaıdy QazAqparat kandıdattyń shtabyna silteme jasaı otyryp.

Kezdesýde úmitker óziniń saılaýaldy baǵdarlamasynyń negizgi baǵyttary týraly aıtyp, áleýmettik áriptestik ınstıtýtyn odan ári damytýdy qamtıtyn azamattyq qoǵam taqyrybyna tolyǵyraq toqtaldy.

Taraptar respýblıkalyq jáne salalyq kásipodaqtardyń jáı-kúıi týraly pikir almasty. Sondaı-aq, kezdesýge qatysýshylar zeınetaqy aýdarymdary, jalaqy, jumysqa ornalasý taqyryptary men óńirdiń máselelerin talqylady.

Buǵan deıin kandıdat Meıram Qajyken Aqtóbe oblysynda birqatar kezdesý ótkizgen bolatyn.

Esterińizge sala keteıik, saılaý aldyndaǵy úgit-nasıhat 2022 jylǵy 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady. 19 qarasha – respýblıka boıynsha tynyshtyq kúni. Al, 20 qarashada prezıdent saılaýy ótedi.