Saılaý-2022: Kandıdattar arasyndaǵy teledebat qaı tilde ótedi

ASTANA. QazAqparat – QR Ortalyq saılaý komıssııasynyń múshesi Asylbek Smaǵulov prezıdenttikke kandıdattar arasyndaǵy televızııalyq pikirsaıys qansha ýaqytqa sozylatynyn aıtty, dep habarlaıdy QazAqparat tilshisi.

«Televızııalyq pikirsaıys «Habar» telearnasynda ótedi. Uzaqtyǵy 80 mınýttan kem bolmaıdy. Kim qaı tilde sóılegisi keledi, qaı tilde suraq qoıǵysy keledi, sol tilde ótedi. Mysaly, saılaýshylardyń atynan da suraqtar kelip túsýi múmkin. Suraq qaı tilde qoıylsa, sol tilde jaýap beredi», - dedi ol OSK otyrysynan keıin uıymdastyrylǵan baspasóz máslıhatynda.

Al «Habar» agenttigi» AQ basqarma tóraǵasynyń orynbasary Dáýlethan Jıenqulov televızııalyq pikirsaıys ýaqyty sozylýy múmkin ekenin joqqa shyǵarmady.

«Teledebat keminde 80 mınýt bolady dep otyrmyz. Ol kandıdattardyń baǵdarlamasyn tanystyrýyna, suraqtarǵa jaýap berýine baılanysty uzaryp ketýi de múmkin. Sondyqtan kandıdattarǵa qandaı da bir shekteý bolady dep oılamaımyn», - dedi ol.

Sonymen qatar Dáýlethan Jıenqulov agenttiktiń elektrondy poshtasyna saılaýshylardan suraqtar kelip túsip jatqanyn jetkizdi.

«Suraqtar vıdeoformatta bolady. Kez kelgen azamat ózi tańdaǵan kandıdatqa saýalyn joldaı alady. Kimnen kelse de, suraq qoıylady. Saýaldyń tikeleı efırde qoıylýyna reglament múmkindik bermeıdi», - dedi telearna ókili.

Foto: ortcom.kz