Saılaý -2021: Kókparshylar daýys berdi

NUR-SULTAN. QazAqparat - Elorda irgesindegi Talapker eldi mekeniniń bir top turǵyny saılaý ýchaskesine atpen kelip, jurtty tań qaldyrdy, dep habarlaıdy QazAqparat «Qazaqstan» ulttyq telearnasyna silteme jasap.

Kókparshylar kúnniń sýyǵyna qaramaı saılaýǵa súlikteı sáıgúlikterin erttep, merekelik kóńil kúımen kelip, óz tańdaýyn jasap ketti.

Temir tulpar minip, jaıaý kelgen saılaýshylarǵa kóz úırendi. Dál at minip, belbeýin býynyp, basyna bórik kıip kelgen saılaýshyny kúnde kórmeıtinimiz anyq. Talapker mektebiniń mańyna kóparshylar óz tańdaýyn jasaý úshin jınaldy. Onymen qosa ulttyq oıyn kókpar men at baptaý ónerin nasıhattaı kelgen.

«Bir jaǵynan sýyq mashına ot almaı qaldy. Sondyqtan atpen keldik»,-deıdi Qazaqstan jylqy ósirýshiler odaǵynyń vıtse-prezıdenti Dıdar Jeksekov.

Saılaý – saıası naýqan. Biraq, Dıdar bastaǵan jigitter búkil el úshin mańyzdy oqıǵaǵa qazaqy reń berdi.