Saılaý-2021: Anglııadaǵy lokdaýnǵa qaramastan qazaqstandyqtar belsendi daýys berip jatyr

LONDON. QazAqparat - Anglııada jalpyhalyqtyq lokdaýn, al Londonda tótenshe jaǵdaı jarııalanǵan. Koronavırýstyń mýtatsııaǵa ushyraǵan jańa túrine baılanysty jaǵdaı ýshyǵyp tur. Biraq jergilikti bılik Tumandy Albıonda ýaqytsha turyp jatqan otandastarymyzǵa saılaý ýchaskesi ornalasqan Qazaqstannyń Ulybrıtanııadaǵy elshiligine kelip, daýys berýge ruqsat etti, dep habarlaıdy QazAqparat tilshisi.

Qazaqstandyqtardyń kópshiligi tańerteń tańdaý jasap úlgerdi. Aıta keteıik, lokdaýn men qatań shekteýlerge qaramastan daýys berýshilerdiń geografııasy aýqymdy.

Halyq Ulybrıtanııanyń túkpir-túkpirinen aǵylýda: Kembrıdj, Ýorık, Edınbýrg, Manchester jáne árıne Londonnan.

Eger basqa qalalardan kelýshiler qaýipsizdik sharalaryn saqtaý úshin avtobýs pen poıyzdyń ornyna kólik jaldap ýchaskege jetse, londondyq qazaqtar velosıped teýip kelip jatyr.

Ýchaskedegiler saılaýdyń ádiletti ári ashyq jáne halyqaralyq standarttarǵa saı ótýi úshin qoldan kelgenniń bárin jasap jatyr.

«Sanıtarlyq talaptardy saqtaı otyryp, qazaqstandyqtardyń shetelde daýys berý konstıtýtsııalyq quqyǵyn júzege asyrý úshin barlyq jaǵdaıdy jasap jatyrmyz. Aıta ketý kerek, Qazaqstan azamattary ádettegideı belsendilik tanytyp otyr. Saılaý ýchaskesiniń ashylǵany týraly aqparat jarııalanǵan sátten bastap 500-den astam saılaýshy tirkeldi. Sonymen qatar saılaýǵa aldyn ala tirkelmegen azamattardyń da qatysýy kútilýde. Saılaýshylardyń sany budan da kóp bolýy múmkin edi. Biraq ókinishke qaraı lokdaýn keri áserin tıgizdi» deıdi №244 saılaý ýchaskesiniń tóraǵasy Janbolat Úsenov.

Qatań karantın shekteýlerine qaramastan halyqtyń kóńil-kúıi kóterińki. Londonda kóshede qazaqstandyqtardy jıi kezdestire bermeısiz.

Sondyqtan saılaýshylar bir-birimen áńgimeleskisi keledi. Biraq áleýmettik araqashyqtyq meılinshe saqtalyp jatyr.

«Men - jumys babymen Ulybrıtanııada ýaqytsha turyp jatqan Qazaqstan azamatymyn. Londonda otbasymmen turamyn. Búgingi saılaý eldiń berekesi men birligin arttyrady dep senemin. Shetelde júrsek te, osyndaı mańyzdy naýqannan tys qalmaıyq dep joldasym ekeýmiz qoǵamdyq kólikti paıdalanbaı, kovıd erejelerin saqtap, velosıpedpen keldik» deıdi saılaýshylardyń biri Qyzylgúl Júsipova.

Ýchaskege kireberiste daýys berýshilerdiń temperatýrasy tekseriledi, sanıtaızer barlyq jerge qoıylǵan. Maska men qolǵaptar da bar.

Tipti qalamsaptar da paıdalanylǵannan keıin zalalsyzdandyrylady.

Ókinishke qaraı, bul jyly elshilikte daýys berýshilerge qazaqtyń ulttyq taǵamdary usynylmaıdy. Óıtkeni sanıtarlyq talaptarǵa sáıkes ruqsat etilmegen.

Saılaý London ýaqyty boıynsha keshki 8-de, ıaǵnı Nur-Sultan ýaqytymen túngi 2-de aıaqtalady.