Saılaý-2019: Jambyl Ahmetbekov prezıdenttikke kandıdat retinde qujattaryn tapsyrdy

NUR-SULTAN. QazAqparat - Qazaqstan Respýblıkasynyń Prezıdenttigine kandıdat retinde Jambyl Aýjanuly Ahmetbekov tıisti qujattaryn tapsyrdy, dep habarlaıdy QazAqparat QR Ortalyq saılaý komıssııasynyń resmı saıtyna silteme jasap.

«2019 jylǵy 26 sáýirde Qazaqstan Respýblıkasy Ortalyq saılaý komıssııasyna «Qazaqstan Respýblıkasyndaǵy saılaý týraly» Qazaqstan Respýblıkasy Konstıtýtsııalyq zańynyń 55-babyna sáıkes «Qazaqstan Kommýnıstik Halyq partııasy» qoǵamdyq birlestigi Qazaqstan Respýblıkasynyń Prezıdenttigine kandıdat retinde Jambyl Aýjanuly Ahmetbekovtyń mynadaı qujattaryn usyndy:

1. «Qazaqstan Kommýnıstik Halyq partııasy» qoǵamdyq birlestigi joǵary organynyń Qazaqstan Respýblıkasynyń Prezıdenttikke kandıdat usyný jónindegi otyrysynyń hattamasynan úzindi;

2. Jambyl Aýjanuly Ahmetbekovtyń Qazaqstan Respýblıkasynyń Prezıdenttigine kandıdat bolyp daýysqa túsýge kelisim bergeni týraly ótinishi;

3. Ómirbaıandyq derekteri;

4. Qazaqstan Respýblıkasy Ortalyq saılaý komıssııasynyń shotyna saılaý jarnasyn engizgenin kýálandyratyn qujat;

5. Jeke basyn kýálandyratyn qujattyń kóshirmesi;

6. Joǵary oqý ornyndaǵy bilimi týraly dıplomdarynyń kóshirmeleri;

7. Memlekettik qyzmette jumys tájirıbesiniń bar ekenin rastaıtyn qujattar.

Memlekettik tildi erkin meńgergendigin anyqtaıtyn lıngvıstıkalyq komıssııasynyń otyrysy 2019 jylǵy 27 sáýirge taǵaıyndaldy», -delingen habarlamada.