Saılaý-2019: TMD baıqaýshylar mıssııasyna júktelgen mindetter ataldy

NUR-SULTAN. QazAqparat - TMD Atqarý komıteti - atqarýshy hatshysy tóraǵasynyń birinshi orynbasary Vıktor Gýmınskıı dostastyqqa múshe elderden keletin baıqaýshylardyń mindetterin atady, dep habarlaıdy QazAqparat tilshisi.

Eske sala ketsek, budan buryn Vıktor Gýmınskıı Qazaqstandaǵy Prezıdent saılaýyn TMD-dan 300 baıqaýshy baqylaıtynyn málim etken edi."Akkredıtatsııadan ótýge qazirgi ýaqytta TMD elderinen 90 ókil ótinish berdi. Bul ótinishter áli túsip jatyr. TMD elderiniń atynan Qazaqstandaǵy Prezıdent saılaýyn baıqaý mıssııasyna qatysatynyn 4 el maquldady. Olar: Belarýs, Tájikstan, Túrikmenstan men Reseı. Sonymen birge, olardyń qataryna TMD Parlamentaralyq assambleıasyn qosýǵa bolady", - dedi Vıktor Gýmınskıı QR OSK-da ótken baspasóz máslıhatynda.

Onyń aıtýynsha, saılaýǵa deıin 20-ǵa tarta uzaq merzimdi baıqaýshy jumys júrgizetin bolady.

"Biz saılaý zańnamasyna jáne oǵan engizilgen ózgeristerge monıtorıng júrgizemiz. Al qysqa merzimdi baıqaýshylar saılaýǵa 2-3 kún qalǵanda kele bastaıdy. TMD elderinen kelgen baıqaýshylar Qazaqstannyń kóptegen óńirlerine jiberiledi",-dedi ol.

Vıktor Gýmınskııdiń aıtýynsha, TMD elderinen keletin shtabtyń negizgi mindeti - TMD elderinen Qazaqstandaǵy saılaý protsesine qatysýǵa nıet bildirgen barlyq qatysýshylardyń uıymdastyrylǵan akkredıtatsııasyn ótkizý, aqparattyq-anyqtamalyq materıaldardy ázirleý, baıqaýshylarǵa QR normatıvti-quqyqtyq aktilerinen úzindilerin taratý, nusqaý berý, aımaqtarǵa taratý jáne shtabpen ózara jumys atqarý bolmaq. Al óńirlerde tıisti quqyqtarǵa saı baıqaýshylar jumys júrgizetin bolady. Naqtyraq aıtqanda, baıqaýshylar zańnamaǵa saı jumys qanshalyqty uıymdastyryldy, saılaý ýchaskeleri ýaqtyly ashyldy ma, qandaı da bir buzýshylyqtar boldy ma, bir adam eki ret daýys berip qoıǵan joq pa - osy tártipterdi baqylaıtyn bolady. Sondaı-aq daýysty sanaý kezinde baıqaýshylar ashyqtyqty qamtamasyz etedi.

TMD-dan baıqaýshylar mıssııasy Qazaqstandaǵy saılaýdy, onyń ishindegi QR Prezıdentiniiń saılaýyn baıqaýda úlken tájirıbege ıe. TMD-dan 700-den astam baıqaýshylar mıssııasy Qazaqstanda 2015-2016 jyldary ótken eki saılaý naýqanyna qatysqan bolatyn.

Eske sala keteıik, QR Prezıdentiniń saılaýy 9 maýsym kúni ótedi. Saılaýǵa 7 kandıdat tirkelip otyr.