Saılaý-2019: Sádibek Túgel memlekettik til synaǵyn tapsyrdy

NUR-SULTAN. QazAqparat - QR Prezıdenttigine kandıdattyń memlekettik tildi erkin meńgergenin anyqtaıtyn lıngvıstıkalyq komıssııa múshesi Ǵarıfolla Esim «Uly dala qyrandary» respýblıkalyq qoǵamdyq birlestigi atynan úmitker Sádibek Túgeldiń emtıhan nátıjesin jarııalady, dep habarlaıdy QazAqparat tilshisi.

Onyń aıtýynsha, úmitker tapsyrmalardy berilgen ýaqytta oryndady jáne qosymsha ýaqytty qajet etken joq.

«Emtıhan talabyna sáıkes, úmitker birinshi kezeńde shyǵarma jazýy tıis. Sádibek Túgel «Táýelsiz memleketter dostastyǵy: tarıhy jáne búgini» taqyrybyn tańdap aldy jáne memlekettik tildi erkin meńgergenin kórsetti. Árıne, keıbir emle qateleri týraly eskertpelerimiz bar, biraq ol memlekettik tildi meńgerýge bóget emes», - dedi Ǵarıfolla Esim Ortalyq saılaý komıssııasynda ótken brıfıngte.

Ekinshi kezeńde úmitker lıngvıstıkalyq komıssııa aldynda 3 bettik mátindi oqýy kerek.

«Ekinshi kezeńde úmitker bılet arqyly Ábish Kekilbaıdyń «Dala balladasyn» tańdap aldy. Bul jerde de Sádibek Túgel óziniń oqý mádenıetin kórsete aldy. Úshinshi kezeńde - sóz sóıleý úshin úmitkerge «Babalar sózi - danalyq kózi» degen taqyryp tústi. Bul kezeńde kandıdat qazaqsha erkin oılap, erkin sóılep, pikir aıta alatynyn tolyq dáleldedi. Jalpy úsh kezeń boıynsha komıssııa ujymy «Sádibek Túgel memlekettik tildi erkin meńgergen» degen sheshimge keldi», - dedi komıssııa múshesi.

Aıta keteıik, 22 sáýirde belgili qoǵam qaıratkeri, jazýshy-jýrnalıst Sádibek Túgel Qazaqstan Respýblıkasynyń Prezıdenttigine kandıdat retinde qujat tapsyrdy. 23 sáýirde «Nur Otan» partııasynyń atynan kandıdat Qasym-Jomart Toqaev memlekettik til emtıhanyn tapsyrǵan edi.