Saılaý-2019: Memleket basshysyna tilshiler tarapynan 30-ǵa jýyq saýal joldandy
Bul týraly búgin óziniń facebook-tegi paraqshasynda Qazaqstan Prezıdenti Qasym-Jomart Toqaevtyń baspasóz hatshysy Berik Ýáliı jazdy, dep habarlaıdy QazAqparat.
«Búgin Memleket basshysy Qasym-Jomart Toqaevtyń kezekten tys Prezıdent saılaýynyń qorytyndysy boıynsha baspasóz-konferentsııasy ótkizdik. Oǵan 66 buqaralyq aqparat quralynan 107 ókil qatysty. Onyń 22-si sheteldik BAQ. Qazaqstan Prezıdentiniń tyǵyz jumys kestesine qaramastan jýrnalıstermen kezdesý 1 saǵattan asa ýaqytqa sozyldy. Qazaq, orys jáne aǵylshyn tilinde 30-ǵa jýyq suraq qoıyldy»,-dep jazdy Berik Ýálı.
Qasym-Jomart Kemelulyna mıtıngter týraly, polıtsııa áreketine qatysty, saılaýǵa boıkot jarııalaý, Eýropadaǵy qaýipsizdik jáne yntymaqtastyq uıymy baqylaýshylarynyń ustanymy jaıynda suraq qoıyldy. Sonymen qatar, Prezıdent Sırııa qaqtyǵysy, Reseımen, Qytaımen jáne basqa da eldermen qarym-qatynas týraly pikirin bildirdi. Sondaı-aq, osy jıynda qazaqstandyqtardy mazalap júrgen bılik tranzıti, áleýmettik jelilerdiń buǵattalýy, jemqorlyq, AES qurylysy, halyqty áleýmettik qorǵaý, Parlament saılaýy men Úkimettiń otstavkasy, osy saılaýdaǵy básekelesterdiń platformalary men usynystaryna qulaq asý máseleleri týraly da aıtyldy.
«Baspasóz-konferentsııasy barysynda Prezıdent birneshe ret ázil áńgime aıtyp, aýdıtorııany serpiltip otyrdy»,-dep jazdy baspasóz hatshysy.