Saılaý-2019: Qazaqstan kommýnıstik halyq partııasy óz kandıdatyn usynady
Jıynnyń kún tártibinde 2019 jylǵy 9 maýsymda ótetin Qazaqstan Respýblıkasy Prezıdentiniń kezekten tys saılaýyna partııa atynan kandıdatýra usyný máselesi tur.
«2019 jyldyń 26 sáýirinde saǵat 10.00-de «Park Inn» qonaq úıinde «Qazaqstan kommýnıstik halyq partııasynyń» Kezekten tys XIV Sezi ótedi. Sezd barysynda 2019 jyly 9 maýsymda ótetin Qazaqstan Respýblıkasy Prezıdentiniń kezekten tys saılaýyna QKHP atynan QR prezıdenttigine kandıdat usynylady», - dep habarlady QKHP resmı saıtynda.
Eske sala ketsek, 9 sáýirde respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev elimizdiń Konstıtýtsııasyna sáıkes QR Prezıdentiniń kezekten tys saılaýyn 2019 jyldyń 9 maýsymynda ótkizý jóninde sheshimin jarııalady.
23 sáýir kúni Nur Otan partııasy atynan Qazaqstan Respýblıkasynyń Prezıdenttigine kandıdat retinde Qasym-Jomart Toqaev usynyldy.
«Aq jol» demokratııalyq partııasynyń kezekten tys XV quryltaıy Danııa Espaevany resmı túrde prezıdenttikke úmitker retinde bekitti.
Odan bólek, «Uly dala qyrandary» respýblıkalyq qoǵamdyq birlestigi atynan qoǵam qaıratkeri, jazýshy-jýrnalıst Sádibek Túgel, «Qazaqstan Respýblıkasynyń kásipodaqtar federatsııasy» Respýblıkalyq kásipodaqtar birlestigi atynan Amangeldi Taspıhov kandıdat retinde tıisti qujattaryn tapsyrdy.
"Aýyl" halyqtyq-demokratııalyq partııasy atynan prezıdent saılaýyna Tóleýtaı Rahymbekov kandıdat retinde usynyldy.