Saılaý-2019: Kandıdat Tóleýtaı Rahymbekov memlekettik tildi bilý synaǵynan ótti
2019 jyldyń 26 sáýirinde «Qazaqstan Respýblıkasyndaǵy saılaý týraly» QR Konstıtýtsııalyq zańynyń 55-babyna sáıkes, Tóleýtaı Rahymbekov «Aýyl» halyqtyq-demokratııalyq patrıottyq partııasy atynan OSK-ǵa qujattaryn usynǵan.
«Lıngvıstıkalyq komıssııanyń kezekti otyrysynda QR Prezıdenttigine úmitker Tóleýtaı Sataıuly Rahymbekov synaq tapsyrdy. Ádettegideı jazylym, oqylym, aıtylym boıynsha úmitker úsh tapsyrmany oryndady. Jazbasha jumysynda oǵan «Bizdiń kúshimiz - birlikte» taqyryby tústi. Oǵan úmitker baıyppen bir saǵattaı daıyndaldy jáne óziniń memlekettik tildi joǵary meńgergendigin kórsetti. Ekinshi oqylym boıynsha - Muhtar Áýezovtiń «Abaı jolyn» tańdap, komıssııa múshelerin qýantty. Sebebi, bul eń basty ári eń qıyn tapsyrmalardyń biri edi. Úshinshi kezeńde kandıdat «Elorda - táýelsizdik tuǵyry» taqyrybynda sóz sóıledi», - dep atap ótti komıssııa múshesi Erden Qajybek OSK-da ótken brıfıngte.
Osy úsh tapsyrmany oryndaý barysynda úmitker memlekettik tildi joǵary deńgeıde meńgergendigin kórsetken.
«Jazylymda emleden tehnıkalyq qateleri boldy, biraq ony asa mańyzdy emes dep esepteımiz. Stıli, sóz saptaýy, saýattylyǵy jaǵynan Tóleýtaı Sataıuly Rahymbekov biraýyzdan memlekettik tildi tolyq meńgergen degen baǵa aldy», - dedi komıssııa múshesi.
T. Rahymbekov 1964 jyly Qaraǵandy oblysy Jańaarqa aýdanynyń Atasý kentinde týǵan. 1986 jyly Qazaq aýylsharýashylyq ınstıtýtyn ınjener-mehanık mamandyǵy boıynsha úzdik bitirgen. 1992 jyly Máskeýde Búkilodaqtyq aýyl sharýashylyǵyn elektrlendirý ǵylymı-zertteý ınstıtýtynyń aspırantýrasyn támamdaǵan. 2001 jyly E. Bóketov atyndaǵy Qaraǵandy memlekettik ýnıversıtetin zańger mamandyǵy boıynsha bitirgen. 2005 jyly Ekonomıka ǵylymdarynyń doktory atanǵan.
Eńbek jolyn 1986 jyly Qazaq aýylsharýashylyq ınstıtýtynyń kishi ǵylymı qyzmetkeri, aspıranty bolyp bastaǵan. Jáne ár jyldary aýyl sharýashylyǵy, turǵyn úı-kommýnaldyq sharýashylyǵy, jol, óndiris, ǵylym salalarynda tájirıbe jınaqtaǵan.