Saılaý-2019: Eń birinshi Japonııa men Koreıada saılaý ýchaskeleri ashyldy
QR Syrtqy ister mınıstrliginiń baspasóz qyzmeti habarlaǵandaı, 9 maýsymda ótetin Prezıdent saılaýynda shamamen 13 myńnan astam sheteldegi qazaqstandyq daýys beredi. Solardyń ishinde Japonııa men Koreıadaǵy otandastarymyz Nur-Sultan ýaqytymen tańǵy saǵat 4-ten bastap jurttyń aldy bolyp saılaýǵa qatyspaq.
«Daýys berý ýaqyty aıaqtalǵannan keıin sheteldegi ýchaskelik saılaý komıssııasy saılaýshylardyń daýsyn sanap, onyń qorytyndysy týraly hattama toltyrady. Bul hattama men basqa da saılaý qujattary Qazaqstannyń dıplomatııalyq ókildikteri men konsýldyq mekemeleri arqyly joldanady», - delingen túsindirmede.
Buǵan deıin habarlaǵanymyzdaı, 2019 jyldyń 9 maýsymynda ótetin QR Prezıdentiniń kezekten tys saılaýyna oraı álemniń 51 elinde 65 saılaý ýchaskesi ashylǵan. Sheteldegi saılaý ýchaskeleriniń mekenjaıyn mfa.gov.kz jáne www.election.gov.kz saıttarynan bilýge bolady.
Jalpy, eń iri saılaý ýchaskesi Qazaqstannyń Beıjińdegi elshiligi janynan ashylyp otyr. Atalmysh saılaý ýchaskesi 1 600-den astam saılaýshyny qabyldaıdy.
Qytaıda Beıjiń qalasynan bólek Shanhaı, Gonkong jáne Úrimshi qalalarynda saılaý ýchaskeleri jumys isteıdi. Jalpy bul elde 2 myńnan astam Qazaqstan azamaty daýys beredi dep kútilip otyr. Reseıde de 1 600-den astam saılaýshy Máskeý, Sankt-Peterbýrg, Qazan, Omby, Astrahan qalalaryndaǵy saılaý ýchaskelerinde daýys bere alady. Túrkııanyń Ankara, Ystanbul jáne Antalııa qalalarynda shamamen 1300 adamǵa arnalǵan saılaý ýchaskeleri jumys isteıdi.
Jalpy bıylǵy saılaýda 9 791 165 qazaqstandyq daýys beredi dep kútilip otyr. Onyń 25 protsenti alǵash ret daýys beredi degen málimetter de bar.