Saılaý-2019: Daýys berý ýchaskeleri neshege deıin jumys isteıdi

NUR-SULTAN. QazAqparat - 2019 jylǵy 9 maýsymda QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi, dep habarlaıdy QazAqparat tilshisi.

Bul týraly QR Ortalyq saılaý komıssııasy tóraǵasynyń orynbasary Konstantın Petrov aıtty.

«Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady. Nemese aýmaqtyq saılaý komıssııasy usynymymen daýys berý ýaqytyn ózgertýge bolady. Sondaı-aq, daýys berý ýaqytyn tańǵy 6-dan erte bastaýǵa bolmaıdy jáne keshki 22.00-ge deıin aıaqtaý qajet», - dedi K. Petrov Ortalyq saılaý komıssııasynda jýrnalısterge bergen suhbatynda.

Osylaısha, elimizdegi 17 aýmaqtyq saılaý komıssııasy keltirgen derekterge sáıkes, 48 saılaý ýchaskesi jergilikti ýaqytpen tańǵy 7-de emes, 6.00-de ashylady.

«Bul ýaqyt óńirlerdegi daýys berýshilerdiń jumys sıpatyna baılanysty. Sondaı-aq, 555 saılaý ýchaskesi tizimdegi barlyq azamattar daýys berip bolǵan soń ǵana jabylady. Bul norma áskerı bólimderde, shalǵaı aýyldarda, otarly mal sharýashylyǵynda, emdeý oryndary men sanatorıılerde, tergeý ızolıatorlarynda júrgiziledi. Osylaısha, Qazaqstan men shet elderde qurylǵan 9 968 daýys berý ýchaskesiniń 48-i óz jumysyn tańǵy 6-da bastaıdy. Al 55 ýchaske tizimdegi barlyq qazaqstandyqtar daýys bergen soń ǵana jabylady. Mundaı ýchaskelerdiń tizimin saılaý komıssııasy 7 kún buryn bekitýi tıis», - dedi Konstantın Petrov.