Saılaý-2019: Brazılııa baıqaýshylary Qazaqstanǵa alǵash ret keldi

NUR-SULTAN. QazAqparat - Qazaqstanda saılaýdy uıymdastyrý jumystary óte jaqsy júrgizilgen. Mundaı pikirdi Brazılııa baıqaýshylar tobynyń basshysy, Brazılııa-Qazaqstan parlamentaralyq dostyq tobynyń tóraǵasy Frantsısko Dasıs Rodrıges bildirdi, dep habarlaıdy QazAqparat tilshisi.

«Qazaqstan Ortalyq saılaý komıssııasy tóraǵasynyń orynbasarymen kezdesý qorytyndysyna oraı, saılaýdy uıymdastyrý jumystary óte jaqsy júrgizilgen dep sanaımyn. Barlyq halyqaralyq baıqaýshylar bul jerge saılaýdy baıqaý maqsatynda kelip otyr. Menińshe, bul baıqaýlardyń qorytyndysy oń bolady. 9 maýsym, jeksenbi kúni saılaý nátıjesin taǵatsyzdana kútemiz», - dedi ol QR OSK tóraǵasynyń orynbasary Konstantın Petrovpen kezdesýden keıingi brıfıngte.

Onyń atap ótýinshe, Brazılııadan kelgen baıqaýshylar Nur-Sultan qalasynyń Esil aýdanynda ornalasqan 4 saılaý ýchaskesinde daýys berý barysyn baıqaıtyn bolady.

«Aıta keterligi, sizderdiń taraptaryńyzdyń resmı shaqyrýy boıynsha kelgen Brazılııanyń 3 baıqaýshysy Qazaqstanda alǵash ret jumys isteıdi. Degenmen olar AQSh jáne Venesýelada ótken saılaýlarǵa baıqaýshy retinde qatysqan», - dedi F.D.Rodrıges.