Saılaý 2019: Azamattyq platforma halyqtan 1500 «amanat» jınady
Platforma múshesi Musaǵalı Daýymbekov halyqpen jumys isteý barysynda el kókeıindegi eń negizgi problemalarǵa qanyqqandaryn aıtady.
«Halyqtyń óz ómirin, memlekettiń damý baǵytyn ózgertýge degen nıeti unady. Bári ony kamera aldynda aıtyp, saıası doda jeńimpazyna jetedi degen úmitpen joldap jatty. Aıtylǵan problemalardyń kóbi medıtsına, bilim berý salasyndaǵy reformalardyń tııanaqtylyǵy, áleýmettik qamsyzdandyrýdaǵy ádiletsiz erejelerdi joıý sııaqty kún tártibinde qyzyp turǵan máselelerdi qozǵaǵan. Eldiń ol amanatyn biz tıisti jerge jetkizemiz dep oılaımyz», - deıdi «Amanat» ókili.
Musaǵalı Daýymbekovtiń aıtýynsha, tek osy saılaý naýqany kezinde óńirlerde 10 myńnan astam baıqaýshy daıyndyqtan ótken.
«Bizdiń elde myńdaǵan qoǵamdyq uıym bar dep aıtamyz. Alaıda osyndaı mańyzdy naýqandarda solardyń jumysy kórinbeıdi. «Amanattyń» jumysy bul saılaýmen toqtap qalmaýy kerek. Biz daıyndaǵan baıqaýshylar erteń elimizdiń atynan ózge memleketterdegi saılaýlarda baqylaý júrgizip jatsa, nesi jaman», - deıdi ol.
Musaǵalı Daýymbekov keshegi saılaý barysynda «Amanat» baıqaýshylary anyqtaǵan 18 kúrdeli zańbuzýshylyqtyń qaı deńgeıde qaralyp jatqanyna da toqtaldy.
«Zańbuzýshylyqtar boıynsha toltyrylǵan aktilerdi áli jınastyryp jatyrmyz. Olar eń sońynda ortalyq shtabqa kelip túsedi. Sodan keıin taǵy bir zerdelep, tıisti organdarǵa joldaımyz. Ár zańbuzýshylyqtyń sońyna deıin qaralyp, zań aldynda tıisti shara qoldanylýyna baqylaý ornatamyz», - dedi platforma ókili.
Eske salsaq, «Amanat» azamattyq platformasy Prezıdent saılaýy kezinde 18 kúrdeli zańbuzýshylyqty anyqtap, akt toltyrǵan bolatyn.