Saılaý-2019: «Amanat» azamattyq platformasy 18 zańbuzýshylyq boıynsha akt toltyrǵan
Platforma jetekshisi Murat Ábenovtiń aıtýynsha, top atynan 11045 baıqaýshy saılaý ýchaskelerinde 1,5 aı boıy jumys júrgizgen.
«Talaı saılaýdy kórip kelemiz. Bıylǵysy erekshe boldy. Azamattardyń saıasatqa qyzyǵýshylyǵy artqanyn baıqadyq. Syn kózben qaraıtyn adamdardy kóp kezdestirdik. Negizi biz zańbuzýshylyqtardy kózge shuqyp kórsetýden buryn, onyń sebepterin anyqtap, aldaǵy ýaqytta boldyrmaýdyń jolyn qarastyrdyq. Kemshilikter men zańbuzýshylyqtar boldy. Áli de jınaqtap, toptastyryp jatyrmyz. 18 kúrdeli zańbuzýshylyq anyqtadyq. Bıýletenderdi toptaǵan 8 oqıǵa tirkeldi. Sondaı-aq, 165 aýyzsha eskertý jasalyp, sol sátte joıyldy», - deıdi Murat Ábenov.
Azamattyq platforma múshesi Shyńǵys Lepsibaev bıýletenderdi toptap tastaý derekteri Shyǵys Qazaqstan, Mańǵystaý, Qyzylorda oblystary men Almaty, Nur-Sultan, Shymkent qalalarynda oryn alǵanyn aıtady. Platformanyń taǵy bir múshesi Ákim Tursyn atalmysh zańbuzýshylyqtar der kezinde anyqtalyp, joly kesilgenin aıtady.
«Biz anyqtaǵan derekterdiń barlyǵynda bıýletenderdiń toptap tastalýyna jol berilgen joq. Ol oqıǵalar boıynsha da akt toltyrylyp, quzyrly organdarǵa berildi. Eger zańsyzdyqtar dáleldense, jaýapty adamdar zań aldynda jaýap beredi», - deıdi Ákim Tursyn.
Azamattyq platforma ókilderi bul málimetterdiń barlyǵy aralyq qorytyndy ekenin atady. Jalpy saılaý kúnindegi jumystardyń tolyq qorytyndysy erteń jarııalanbaq.