Saılanǵan ákimniń jaýapkershiligi taǵaıyndalǵan ákimnen joǵary — aýyl ákimi

<p>ASTANA. KAZINFORM &mdash; Rafıǵat Tájıdenova 2017 jyldan beri Atyraý oblysy Isataı aýdany Qamysqala aýylynyń ákimi qyzmetin atqaryp keledi. 2021 jyly aýyl halqynyń basym bóliginiń qoldaýymen qaıta ákim bolyp saılanǵan. Oraıy kelgende aýyl ákiminen saılaý, jergilikti ózin-ózi basqarý men aýyl bıýdjeti týraly suraǵan edik.&nbsp;</p>

«Saılanǵan ákimniń jaýapkershiligi taǵaıyndalǵan ákimnen joǵary. Óıtkeni, aýyl ákimi bolyp 2017 jyly qazanda saılandym, ol kezde aýdandyq máslıhat depýtattary jabyq daýys berýi arqyly saılandy. 2021 jyly saılaý týraly zańǵa ózgerister engizilgennen keıin, sol jyly 7 qarashada aýyl halqynyń 82,5% daýsyn jınap, qaıta ákim bolyp saılandym. Jumys baǵytymyz kósh ilgeri, aýylymyz damyp kele jatyr. Ózderińiz bilesizder, Atyraý oblysy bıýdjet boıynsha kósh bastap turǵan óńir», — dedi Rafıǵat Tájıdenova agenttik tilshisimen áńgime barysynda.

Aýyl ákiminiń aıtýynsha, búginde eldi mekenderde ınfraqurylym damyp keledi, degenmen sheshilýi tıis máseleler de bar.

«2021 jyldan bastap jergilikti ózin-ózi basqarý tujyrymdamasy iske asyp keledi, ol boıynsha bizge biraz jaýapkershilik júktelgen. Aldymen jergilikti máselelerge qatysty sheshimder qabyldaýda azamattardyń belsendiligin arttyrý. Sonda ǵana aýyldyq, aýdandyq odan ári respýblıkalyq deńgeıdegi máselelerdi aıqyndap, sheshý joldaryn naqty qarastyratyn bolamyz», — deıdi ol.

Sondaı-aq, R. Tájıdenova aýyl bıýdjeti men qarjylyq derbestikke qatysty oıymen bólisti. 

«Bıýdjet jetkilikti dep aýyz toltyryp aıtýǵa kelmeıdi. Sebebi biz IV deńgeıli bıýdjettiń qalyptasatyny ol 6 salyq túri, sonymen qatar salyq emes túsimder, olar aýyldyń bir jyldyq bıýdjetin jappaıdy. Biraq, aýyldyq jerlerde shaǵyn kásipkerlikti, aýyl sharýashylyǵyn odan bólek «Aýyl el besigi», «Aýyl amanaty» baǵdarlamalaryn damytyp, sodan túsken qarjy aýylda qaldyratyn bolsaq, jergilikti bıýdjetti qalyptastyra alamyz dep senemin. Al salyq túsimi jergilikti bıýdjetti tolyqtaı jabýǵa, tipti jartylaı jabýǵa da kelmeıdi. Biz aýdandyq, oblystyq transfertti alyp, jumys istep jatyrmyz. Jergilikti ózin-ózi basqarýdy damytý úshin tolyqqandy qarajat pen quzyrettilik kerek», — deıdi aýylynyń ákimi.

Eske sala keteıik, 2021 jyly 25 mamyrda Prezıdent Qasym-Jomart Toqaev saılaý týraly Konstıtýtsııalyq zańǵa ózgertýler men tolyqtyrýlar engizýdi kózdeıtin qujatqa qol qoıǵan bolatyn.

Ulttyq ekonomıka mınıstrligi aýyl ákimderin tikeleı saılaý qalaı ótetindigin túsindirdi.

Aıta ketsek, 2025 jyldan bastap oblys ortalyqtarynyń ákimderi saılanady.