Saılanǵan ákimder arnaıy tekserýden ótkennen soń ǵana resmı qyzmetine kirise alady - OSK

ASTANA. 10 tamyz. QazAqparat - Saılanǵan aýyl ákimderi arnaıy tekserýden ótkennen soń ǵana resmı qyzmetine kirise alady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde aýyl ákimderiniń saılaýyna qatysty ótken brıfıngte QR Ortalyq saılaý komıssııasynyń múshesi Vladımır Foos málim etti.

«Aýyl ákimderi saılanǵannan soń, olardy bes kúnniń ishinde aýdandyq nemese qalalyq saılaý komıssııalary tirkelýden ótkizedi. Bul týraly saılanǵan ákimnen joǵary turǵan aýdan nemese qala ákimderine habarlama jasalady. Al osydan soń joǵaryda turǵan ákim saılanǵan ákimdi aýyl ákiminiń mindetin ýaqytsha atqarýshy retinde taǵaıyndaıdy. Mine, osy ýaqytta saılanǵan ákim arnaıy tekserýden ótkiziledi. Arnaıy tekserýden ótkennen soń ǵana ákim resmı qyzmetine kirise alady», - dep túsindirdi V. Foos.

Onyń aıtýynsha, barlyq úderisterden ótkennen soń ǵana ákimderge arnaıy kýálikter tapsyrylyp, eńbek kelisimsharty jasalady.

Al OSK tóraǵasy Qýandyq Turǵanqulov arnaıy tekseristen óte almaǵan saılanǵan ákimniń qyzmetke kirise almaıtynyn, sol úshin ol boıynsha da jańa saılaý taǵaıyndalatynyn jetkizdi.