Saıajaılarǵa eldi meken mártebecin berý boıynsha keshendi jospar qarastyrý qajet - senator
Senator ásirese, Almaty oblysynyń ortalyǵyndaǵy káriz sýlaryn tazartý qurylystarynyń jaı-kúıine jáne óńir turǵyndaryn aýyz sýmen qamtamasyz etetin Qapshaǵaı sý qoımasyna aǵyndy sýlardyń túsý qaýpi joǵary ekendigine alańdaýshylyq bildirdi.
«Qonaev qalasynyń káriz tazartý qurylystary 1968 jyly paıdalanýǵa berildi, bul rette ǵımarattar men qurylystar 100 paıyz tozǵan. Sý qoımasy Balqash kóline deıin lastanǵan jaǵdaıda aýqymdy ekologııalyq apat oryn alýy múmkin. Qazirgi jaǵdaıda Qonaev qalasynyń aýmaǵynda jergilikti aýqymdaǵy tehnogendik sıpattaǵy tótenshe jaǵdaı jarııalandy. Tez arada qalanyń káriz-tazartý qurylystaryn rekonstrýktsııalaýǵa qarajat bólý qajet», - dedi senator.
Janbolat Jórgenbaev depýtattyq saýalynda saıajaı turǵyndarynyń máselesin de kóterdi. Onyń aıtýynsha, Almaty qalasy mańyndaǵy saıajaı turǵyndary áleýmettik nysandardyń joqtyǵyna, joldyń nasharlyǵyna, aýyz sýdyń sapasyzdyǵyna, elektr qýatynyń jıi sónýine jáne qoǵamdyq kóliktiń kelmeıtinine shaǵymdanady. Sondaı-aq aýyl mártebesiniń joqtyǵynan «Nurly jer» memlekettik baǵdarlamasynda saıajaılarǵa ınfraqurylym júrgizý qarastyrylmaǵan.
«Qazaqstan Respýblıkasynyń ákimshilik-aýmaqtyq qurylysy týraly» zańyna sáıkes strategııalyq jáne áleýmettik-ekonomıkalyq jaǵdaılaryn esepke alyp jáne sanıtarlyq normalardy qarastyra otyryp, saıajaılarǵa eldi meken mártebecin berý boıynsha keshendi jospar qarastyrý qajet. Eger saıajaılardaǵy turǵyndardyń 183 myńy Almaty syndy alyp megapolıstiń aınalasyndaǵy aýdandarda turatyndyǵyn eskersek, olardyń eldi meken statýsyn alýy, ońtústik astananyń júktemesin jeńildetip qana qoımaı, oblystyń da órkendeýine ózindik serpin beredi», - dedi senator Janbolat Jórgenbaev.
Senator Qonaev qalasynan temirjol baǵyttaryn ashý, qoldanystaǵy oblys ishindegi avtomobıl joldaryn keńeıtý, avtovokzaldar men avtobeketter salýdyń mańyzdylyǵyn da atap ótti.