Saıajaılar qys mezgilinde turýǵa arnalmaǵan - TJD

NUR-SULTAN. QazAqparat – Saıajaılardaǵy órt qaýipsizdigine erekshe nazar aýdarý qajet. Elorda ákimdiginde ótken brıfıngide Nur-Sultan qalasy Memlekettik órt baqylaý basqarmasynyń bastyǵy Erkin Otarǵalymuly osylaı málimdedi, dep habarlaıdy QazAqparat tilshisi.

«Biz saıajaılardyń qys mezgilinde turýǵa beıimdelmegenin túsinemiz. Ondaǵy elektr symdary ýaqytsha ári jyly kezeńderge arnap jasalǵan. Úılerdiń qabyrǵalary da óte juqa. Ony jylytý úshin turǵyndar peshterge shamadan tys otyn salady. Al peshter qatty ystyq temperatýrany kótere almaıdy. Bul óz kezeginde órt shyǵý qaýpin arttyrady. Sondyqtan, saıajaılarda turatyn adamdarǵa murjanyń syrtqa shyǵatyn mańaıyn janbaıtyn, otqa tózimdi kirpishterden salýdy usynamyz. Budan ózge, peshti ashqan ýaqytta onyń aldyna kómir shoqtary túsedi. Osyǵan baılanysty edenge janbaıtyn materıaldardan jasalǵan tósenish qoıylýy tıis», - dep eskertti basqarma basshysy.

Erkin Otarǵalymulynyń aqparatynsha, elordada aýmaǵynda 10 myńǵa jýyq saıajaı bar. Onyń basym bóliginde qys mezgilinde adamdar turady.