Saıajaıǵa arnalǵan jerdegi úılerdi memleket esebinen tolyq kóshirý kerek – Abzal Quspan
«Batys Qazaqstan oblysynda sý tasqyny saldary boıynsha birinshe kezekte eldi sýdan qaýipsiz aımaqqa kóshirý kerek dep esepteımin. Biz bir nárseni anyq túsinýimiz kerek. Jahandyq jylyný jaǵdaıynda mundaı sý tasqyndary Qazaqstanda endi jıileı bermek. Ol – aksıoma. Sol sebepti saıajaıǵa arnalǵan jerdegi úılerdi memleket esebinen tolyq kóshirý ǵana jalǵyz ári durys sheshim bolmaq. Ol úshin oblysta, jalpy Qazaqstanda jer jetedi. Biraq oǵan jańadan jer bólip, egjeı-tegjeıli josparlaý jobasyn jasatyp, kommýnıkatsııa tartyp qajet emes. Kezinde sybaılas jemqorlyqpen zańsyz berilgen jerler esebinen jańadan qurylys bastap ketýge ábden bolady. Batys Qazaqstan oblysynda ondaǵan jyldar boıy keıbir pysyqtar men pysyqaılar júzdegen, myńdaǵan gektar jerdi memleketten tegin alyp, ony 10 «sotyqtan» bólip, halyqqa satyp keldi. Ol jerlerde egjeı-tegjeıli josparlaý jobasy bar, keıbirine kommýnıkatsııa da tartylǵan. Bir tańǵalarlyǵy, olardyń áreketinen jergilikti quqyq qorǵaý organdary eshqandaı zańǵa qaıshy áreket kórmeıdi», - degen depýtat Oral qalasyndaǵy óreskel zańsyzdyqty eske aldy.
Onyń aıtýynsha mundaı zańsyzdyqtarǵa oblys basshylǵynyń da qatysy bar.
«Jalpy Batys Qazaqstan oblysyna ákim bop kelgen azamattar jer satýdy kásipke aınaldyryp aldy. Naqty mysal, eki myńynshy jyldardyń basynda Gaıdenko degen pysyq oblys ákimshiligi arqyly júzdegen gektar jer alyp, ony kúni búginge deıin satyp taýysa almaı júrgenin quqyq qorǵaýshylar emes, qarapaıym bloger Aıbolat Bókenov anyqtady», - dedi Abzal Quspan.
Depýtat osyǵan uqsas zańsyzdyqtar Atyraý oblysynda da bolǵanymen, quqyq qorǵaý organdary dereý den qoıyp, ister sotqa jetkenin aıtady. Al Batys Qazaqstanda munaı qozǵalys baıqamaǵan. Sondaı-aq ol óńirdegi osy zańsyzdyqtardy kórsetip Bas prokýratýraǵa joldaǵan saýaly oblystyq prokýratýradan biraq shyqqanyn aıtady.
«Myńdaǵan derdi jemqorlyq jolmen taratqan da, 10 «sotyq» jerge qol jetkize almaı otyrǵan qarapaıym adamdarǵa saıajaı jerinen úı salýǵa ruqsat bergen de ákimder. Endeshe ákimder óz qatelerin ózderi túzesin. Halyqty sýǵa ketpeıtin, qaýipsiz jerge kóshirsin. Jer ıesi – memleket. Al Konstıtýtsııa boıynsha memlekettik bıliktiń qaınar kózi – halyq. Sondyqtan Oral qalasyndaǵy sýǵa ketken saıajaı turǵyndaryn qaýipti aımaqtan kóshirý kezek kúttirmes sharýa. Ol úshin eki kezekti eki jylǵa arnalǵan shaǵyn baǵdarlama qajet. Birinshi kezekte úıi turýǵa jaramaıtyn azamattarǵa bıyl salynyp, kelesi jyly qalǵan adamdardy kóshirsek, biz azamattarymyzdyń da quqyǵyn qorǵaımyz jáne bolashaqta memleket esebinen taǵy da mıllıardtaǵan shyǵyndardyń aldyn alamyz. Depýtattyq saýalǵa Batys Qazaqstan oblysyndaǵy jerge qatysty materıaldarymdy qosa joldaımyn», - dedi Abzal Quspan.