Saıası jańǵyrý Qazaqstannyń ekonomıkasyn ǵana emes, barlyq salasyn qamtýy kerek - Ǵalymjan Dúısen

ALMATY. QazAqparat - Almatyda Fılosofııa, saıasattaný jáne dintaný ınstıtýtynda ǵalymdar «Eldegi saıası júıeni jańǵyrýy» taqyrybynda ótken konferentsııada bas qosyp, konstıtýtsııalyq reforma aıasyndaǵy memlekettik bılik tarmaqtary arasynda ókilettilikterdi qaıta bólý máselesine qatysty óz pikirlerimen bólisti, dep habarlaıdy QazAqparat tilshisi.

Jıynda baıandama jasaǵan QR BǴM ǴK R.Súleımenov atyndaǵy Shyǵystaný ınstıtýty dırektorynyń orynbasary Ǵalymjan Dúısen elimizdi ǵylymı jańǵyrtý jumystaryn kúsheıtý qajettigin aıtty.

«Jańǵyrý - Qazaqstannyń ekonomıkasyn ǵana emes, barlyq salasyn qamtýy kerek. Negizi máseleniń biri ǵylym salasyn jańǵyrtý qajettigin aıtqym keledi. Ǵylym salasyn jańǵyrtý arqyly ǵylymǵa jańa tehnologııalardy tartýǵa bolady. Kadr daıyndaý máselesi de ózekti. Mysaly, 2016 jyldyń qorytyndysy áli daıyn bolmaǵandyqtan, 2015 jyldyń statıstıkasyna súıensek, Qazaqstanda 1 800-den astam ǵylym doktory bolsa, sonyń 46-sy ǵana 25 pen 44 jastaǵy ǵalymdar eken. Qalǵany 45-65 jáne odan joǵary jastaǵy ǵalymdar. ıAǵnı, 90 paıyzdan artyǵy egde jastaǵy ǵalymdar. Osy máseleni sheshý úshin ǵylymı kadrlardy qolǵa alý kerek», - deıdi ekonomıka ǵylymdarynyń doktory Ǵ.Dúısen.

Aıta keteıik, konferentsııada Qazaqstandaǵy saıası júıeniń jańǵyrýy, konstıtýtsııalyq reforma aıasyndaǵy memlekettik bılik tarmaqtary arasynda ókilettikterdi qaıta bólý, Parlamenttiń memlekettik basqarý júıesindegi rólin kúsheıtý sekildi máseleler talqylandy.

Ǵalymdar Qazaqstan prezıdentiniń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýy aıasynda jańǵyrýdyń qoǵamdaǵy turaqtylyq pen damý faktory retinde modernızatsııalyq úderisterdiń fılosofııalyq, saıası-quqyqtyq jáne ekonomıkalyq aspektileri jóninde pikir almasty.