Saıası uıymdar sý tasqynymen kúreste birlik pen yntymaqtyń úlgisin kórsetti – Prezıdent
«Amanat partııasynyń barlyq múshesi kóktemgi alapat sý tasqyny kezinde bekem birliktiń úlgisin kórsetti. Olar bógetter salýǵa jáne azamattardy evakýatsııalaýǵa, gýmanıtarlyq kómek jınap, elge taratýǵa birge qatysty. «Aýyl» partııasynyń bastamasymen turǵyn úılerdi jáne áleýmettik nysandardy qalpyna keltirý úshin stýdentterdiń qurylys jasaqtary jedel quryldy. «Aq jol» partııasy sý tasqynymen kúresýge 200-den astam arnaıy tehnıka jetkizdi. Respublica, JSDP jáne Qazaqstan halyq partııasynyń belsendileri de shet qalmaı, zardap shekken azamattarǵa alǵashqylardyń biri bolyp qoldaý kórsetti», - dedi Q. Toqaev forýmda.
Prezıdent bul aýqymdy jumysqa partııalardan saılanǵan, sondaı-aq ózin-ózi usynǵan máslıhat depýtattary da belsendi atsalysqanyn aıtty. Eń aldymen, osy maqsatqa bólingen qarjynyń jumsalýyn baqylaýǵa kómektesti.
«Árbir partııa óz qyzmetinde, negizinen, elektoratyna baǵdar ustaı otyryp áreket etetini túsinikti. Olar bir-birimen básekelesip, saılaýshylardyń daýysy úshin kúresetinin kórip otyrmyz. Alaıda partııalar jalpyulttyq mindetterdi sheshý úshin kúsh-jiger biriktirýge daıyn. Saıası uıymdar kóktemgi sý tasqynymen kúres kezinde dál osyndaı birlik pen yntymaqtyń úlgisin kórsetti. 9 myńnan astam otbasy sý basqan úılerin jóndeýge jáne qalpyna keltirýge tólem aldy, 6 myńǵa jýyq otbasyna baspana satyp alýǵa qarjy bólindi. Qysqa merzimde 2,5 myńnan astam jańa úı salyndy. Josparlanǵan 2680 úıdiń 2620-sy paıdalanýǵa berildi.
Munyń barlyǵy – memlekettiń, bıznestiń jáne qoǵamnyń birlese atqaryp jatqan jumysynyń nátıjesi. Men saıası partııalar, máslıhattar men qoǵamdyq uıymdar dál osyndaı myzǵymas birlikte jumys isteýi kerek dep sanaımyn. Túptep kelgende, aldymyzda turǵan maqsat – ortaq. Bul – elimizdi órkendetý jáne halyqtyń turmys sapasyn jaqsartý», - dedi Qasym-Jomart Toqaev.