Saıası reformalar Qazaqstanda evolıýtsııalyq jolmen damyp keledi - tarıhshy
«Prezıdent Qasym-Jomart Toqaev búgin saıası reforma baǵyttaryna toqtalyp ketti. Saıası reformalar Qazaqstanda evalıýtsııalyq jolmen damyp jatqanyn kórsetedi. Biz, halyq, shynymen de reformalardyń nátıjesin tez kórgimiz keledi. Al negizgi saıası reformalardyń uzaqqa sozylatyny málim. Birinshiden, saıası reformany damytýǵa jaǵdaı jasalǵanyn kórsetedi. Buǵan deıin praımerız degen bolmady. Debat ta qajet. Osy joldy damytyp, mejeni 7 paıyzdan 5 paıyzǵa túsirý usynyldy. Bolashaqta partııalardyń joly ashylady. Ekinshiden, aýdan ákimderi de saılanady. Jańa bastamanyń bári halyqqa der kezinde kórsetilip, nasıhattalǵany abzal», - dedi Q.Jubanov atyndaǵy Aqtóbe óńirlik ýnıversıtetiniń prorektory Rahym Beknazarov.
Tarıhshy jańa reformalardy iske asyrý úshin bilikti kadr qajet ekenin de alǵa tartty.
«Reformany aıtý bar, ony iske asyrý jóni bólek. Syrttan kelip ony eshkim jasamaıdy. Osy tusta Prezıdent Qazaqstannyń adamı kapıtaly, kadr máselesi jaıly aıtty. Bilim, medıtsına, shaǵyn jáne orta bıznes salasy... Siz ben biz osy reformany iske asyramyz», - dedi Rahym Beknazarov.