Saıası partııalardy jeńildetilgen tártippen tirkeý qashan bastalady

ASTANA. QazAqparat – Jańa saıası partııalardy jeńildetilgen tártippen tirkeý týraly zań jobasy aldaǵy bir aıdyń kóleminde qabyldanady. Qazaqstandyq jýrnalıst Nartaı Aralbaıulynyń YouTube-arnasyna suhbat bergen Parlament Májilisiniń spıkeri Erlan Qoshanov osylaı málimdedi, dep habarlaıdy QazAqparat tilshisi.

«Parlament saılaýyna deıin úlgeredi. Taıaý arada qabyldanady. Aldaǵy 1 aıdyń kóleminde qabyldanady dep oılaımyn. Sebebi, ol zań jobasy Májiliste qaraldy. Endi Senattyń qaraýynda. Sodan keıin Prezıdent qol qoıady da, qoldanysqa enedi. Osy zań qabyldanǵannan keıin saıası partııalarǵa jeńildetilgen júıemen tirkelýge múmkindik týady. Májilis saılaýy kelesi jyly dep otyrmyz ǵoı. Sondyqtan, olardyń úgit-nasıhat júrgizip, halyqqa tanylýyna tolyq múmkindikteri bolady», - dep túsindirdi Parlament Májilisiniń spıkeri.

Erlan Qoshanovtyń málimdeýinshe, Májilis saılaýynyń kelesi jyly ótýiniń naqty sebebi bar. Jańa saıası partııalardy jeńildetilgen tártippen tirkeý zańy bıyl qabyldanbaq. Onyń aıýynsha, eger atalǵan zań qoldanysqa enbeı, saılaý osy jyly ótkizilse, onda oǵan jańa partııalar qatysa almaıdy. Sondyqtan, onyń merzimi kelesi jylǵa belgilengen.

Eske sala keteıik, buǵan deıin Erlan Qoshanov Prezıdent saılaýynyń kúzgi maýsymǵa belgilený sebebin túsindirgen bolatyn.