Saıası partııalar qyzmetin damytýdyń básekelestik múmkindikteri keńeıtiledi - Senat
«Zań jobasynyń maqsaty – Úkimettiń zań kúshi bar ýaqytsha aktilerdi qabyldaý tetikterin belgileý, saıası partııalardy tirkeý rásimderin ońaılatý, halyqtyń jerge menshik quqyǵyn bekitý, Assambleıa Keńesiniń Parlament Senatynyń depýtattyǵyna kandıdattardy qalyptastyrý bóliginde Joldaý aıasyndaǵy saıası reformalardy tolyqqandy iske asyrýdy qamtamasyz etý. Zań jobasy jeti negizgi baǵyt boıynsha túzetýlerdi kózdeıdi. Birinshiden, Prezıdentke qatysty túzetýler eskerilgen. Zań jobasynda Prezıdenttiń jergilikti atqarýshy organdar men Joǵary Sot Keńesine qatysty jekelegen ókilettikterin qysqartý, sondaı-aq Prezıdent laýazymynda bolǵan kezeńde jekelegen shekteýler engizý jónindegi túzetýler qamtylǵan», - dedi Ádilet mınıstri Qanat Mýsın.
Ekinshiden, Úkimetke qatysty túzetýler qamtylǵan. Úkimet endi Konstıtýtsııada qabyldanǵan túzetýlerge sáıkes, zań kúshi bar ýaqytsha qaýlylar qabyldaý ókilettigine ıe.
«Úshinshiden, bıliktiń ókildi tarmaǵyn qaıta formattaý. Máslıhattardyń sýbektıvtiligi men derbestigin nyǵaıtý maqsatynda «máslıhat tóraǵasy» laýazymyn engizý usynylady. Tórtinshiden, ákimderdi taǵaıyndaý tártibin ózgertý. Máselen, oblystardyń, respýblıkalyq mańyzy bar qalalardyń, astananyń ákimderin taǵaıyndaý Memleket basshysynyń máslıhattardyń qaraýyna balamaly negizde keminde eki kandıdatýrany usynýy jolymen júzege asyrylady. Besinshi – saıası partııalardy tirkeýdiń sandyq shegin tómendetýge qatysty túzetýler. Bul turǵyda zań jobasynyń belgilengen baǵyttaryn iske asyrý konstıtýtsııalyq zańnamany júrgizilip jatqan saıası reformalarmen sáıkestendirýdi qamtamasyz etedi dep paıymdaımyz», - dedi mınıstr.
Sonymen qatar, bos sýdıa laýazymdaryna konkýrstyq rásimderdi onlaın translıatsııalaýdy engizýge baǵyttalǵan jekelegen túzetýler eskerilgen.
«Munymen qosa, zań jobasynda Konstıtýtsııalyq sotty qurýǵa, «Prokýratýra týraly» jáne «Qazaqstan Respýblıkasyndaǵy Adam quqyqtary jónindegi ýákil týraly» zańdarǵa Konstıtýtsııalyq zańdardyń mártebesin berýge, Esep komıtetin Joǵary aýdıtorlyq palataǵa qaıta formattaýǵa baılanysty túzetý normalary da qamtylǵan», - dedi vedomstvo basshysy.