Saıası partııa retinde tirkele almaı júrgenderdiń basty qateligi nede - mınıstr jaýaby

NUR-SULTAN. QazAqparat – Saıası partııa retinde tirkelý týraly ótinish bergen bastamashyl toptardyń tiziminde qaıtys bolǵan adamdar men áskerıler bolǵan. QR Ádilet mınıstri Marat Beketaev ortalyq kommýnıkatsııalar qyzmetinde ótkne brıfıngide osyndaı málimet berdi, dep habarlaıdy QazAqparat tilshisi.

«Negizgi qatelikterge kelsek, usynǵan tizimderde ómirden ótken adamdar men basqa partııanyń músheleri, áskerı adamdar boldy. Osyndaı qatelikteri bar», - dedi mınıstr BAQ ókiliniń suraǵyna bergen jaýabynda.

Onyń aıtýynsha, mundaı kemshilik zańǵa qaıshy.

«Birinshiden, bastamashyl top bir myń adamnyń tizimin ákelý kerek. Osy tizimde qaıtys bolǵan adamdar bolsa, basqa partııalardyń músheleri bolsa, áskerı adamdar bolsa, árıne, biz oǵan eshqandaı qujat bere almaımyz. Óıtkeni ol zańǵa sáıkes kelmeıdi», - den naqtylady Marat Beketaev.

Mınıstrdiń pikiri boıynsha, qujatyn saýatty jınap ákelgen uıymdardyń tirkelýine eshqandaı kedergi qoıylyp otyrǵan joq.

«Biz Qazaqstandy bul máselede ózge eldermen salystyrmaımyz. Óıtkeni bizdiń ómirimiz basqa. Óz jolymyz bar jáne ahýal da basqa. Bul sheshimge tek men nemese mınıstrlik qana emes, basqa da kóptegen sarapshylarmen jan-jaqtan qaraýy arqyly keldik. Ol zańdy Parlament qabyldap, Prezıdent qol qoıdy. Eger myqty adamdar bas biriktirse, qujattardyń bári zań boıynsha engizse, árıne olaryń partııasy tirkeledi», - dedi Ádilet mınıstri.