Saıası laýazymda otyrǵan Prezıdent týystary qyzmetinen ketedi

NUR-SULTAN. QazAqparat – Konstıtýtsııaǵa Prezıdenttiń jaqyn týystarynyń joǵary laýazymdarǵa otyrýyna tyıym engiziledi. Zań kúshine engennen keıin Prezıdent týystary laýazymdaryn bosatady. Bul týraly QR Ádilet mınıstri Qanat Mýsın aıtty, dep habarlaıdy QazAqparat tilshisi.

«Mınıstrler men olardyń orynbasarlary jaıynda aıtqanymda keıbir laýazymdardy ǵana atap ótken edim. Jalpy, Konstıtýtsııaǵa Prezıdenttiń jaqyn týystaryna saıası laýazymdarǵa ornalasýyna tyıym engiziledi. Saıası laýazymdardyń tizimi barynsha keń. Oǵan belgili bir dárejedegi dıplomatııalyq qyzmetkerler de kiredi. Olardy tolyq tizip shyqqan joqpyn. Saıası laýazymdardy tizimi ashyq, qoljetimdi. Sondyqtan kez kelgen adam qarap, qorytyndy shyǵara alady», - dedi mınıstr Ortalyq kommýnıkatsııalar qyzmetindegi baspasóz máslıhaty barysynda.

Osy rette Qanat Mýsın BAQ ókilderiniń Prezıdenttiń jaqyn bir týysynyń shet memlekette Elshi qyzmetin atqaryp júrgenine qatysty saýalyna jaýap berdi.

«Mundaı tyıym engizilgennen keıin barlyǵy zańnamaǵa sáıkes keltiriledi. Ol bul laýazymdy bosatady. Óıtkeni, zańǵa sáıkes ol bul qyzmetti atqara almaıdy», - dedi ol.