Saıası-ekonomıkalyq reformalarmen qatar áleýmettik-gýmanıtarlyq salada da mańyzdy reformalar júzege asty - Erlan Qarın

<p>Osydan bir jyl buryn ótken kezekten tys prezıdent saılaýynda Qasym-Jomart Toqaevqa saılaýshylardyń 80 paıyzy daýys berdi. Bul kórsetkish halyqtyń Prezıdentke degen senimi joǵary ekenin aıqyn ańǵartty. Memlekettik keńesshi Erlan Qarın osyndaı pikirde, dep habarlaıdy <a href="https://kaz.inform.kz/news/mangistauda-turmistik-zorlikka-ushiragan-11-ayel-shugil-komek-korsetu-ortaligina-zhugngen-5b8dd2/Kazinform" target="_blank" rel="noopener">Kazinform</a>.</p>

Ol Memleket basshysy 2019 jyly júzege asyra bastaǵan aýqymdy ári jan-jaqty reformalar qaıta saılanǵannan keıin de dáıekti túrde jalǵasyn tapqanyn atap ótti.

"Prezıdent saılaýy jańa saıası naýqandar kezeńine jol ashty. Sonyń nátıjesinde Parlamenttiń qos palatasynyń jáne máslıhattyń saılaýy ótip, olardyń quramy edáýir jańardy.

Úsh apta buryn Qazaqstanda alǵash ret aýdan jáne oblystyq mańyzy bar qala ákimderiniń saılaýy boldy.

Osylaısha, elimizdiń saıası júıesin demokratııalyq jolmen ózgertý úderisi úzdiksiz jalǵasyp keledi", - dep jazdy Erlan Tynymbaıuly jelidegi paraqshasyna.

Onyń paıymynsha, Prezıdent Qasym-Jomart Toqaevtyń strategııalyq baǵdary Qazaqstan qoǵamynyń barlyq salasyn qanattastyra reformalaýǵa baǵyttalǵan. Sondyqtan Prezıdent óziniń qyrkúıektegi Joldaýynda elimizdiń jańa ekonomıkalyq modelge kóshetinin jarııalady.

"Bul qadam ekonomıkany odan ári monopolııasyzdandyrý men ártaraptandyrýdy, ónerkásipti, aýyl sharýashylyǵyn, kólik pen logıstıkany, qarjy salasyn damytýdy, shaǵyn jáne orta bızneske júıeli qoldaý kórsetýdi kózdeıdi.

Saıası jáne ekonomıkalyq reformalarmen qatar áleýmettik-gýmanıtarlyq salada da mańyzdy reformalar júzege asyrylady. Ondaǵy maqsat – bilim berý, ǵylym jáne mádenıet salasyn damytý arqyly ulttyń jańa sapasyn qalyptastyrý", - delingen jazbada.

Erlan Qarın Prezıdenttiń saılaý aldyndaǵy tuǵyrnamasynda aıtylǵan basty bastamalar bıyl júzege asyryla bastaǵanyn eske saldy. Onyń qatarynda «Ulttyq qor – balalarǵa» jobasy, «Aýyl amanaty» baǵdarlamasy, zańsyz jolmen alynǵan jáne shetelge shyǵarylǵan aktıvterdi elge qaıtarý sııaqty bastamalar bar.

"Jalpy, Prezıdent strategııasynyń barlyq baǵyty – saıasat, ekonomıka jáne ıdeologııa úsheýi birikkende elimizdi júıeli túrde jańǵyrtýdy kózdeıtin birtutas baǵdarlamany quraıdy", - dedi Memlekettik keńesshi.