Saıasattanýshy prezıdenttik reformalardyń tıimdiligin joǵary baǵalady

ALMATY. QazAqparat- «Beıbit jınalystar týraly jańa zańnyń qoldanysyna sholý» taldamaly baıandama avtorlarynyń biri Marat Shıbutov qazaqstandyqtardyń saıası belsendiliginiń qalaı artqany týraly pikir bildirdi, dep habarlaıdy QazAqparat tilshisi.

«Men Almatyda mıtıng ótkizetin jerlerdi anyqtaýdan bastap, zańnyń ázirlep, qabyldanýyna deıin qatystym. Osy zańǵa qatysty barlyq is-sharanyń basy - qasynda boldym. Eski zań 20 jyldan astam ýaqyt qoldanysta boldy. Sol zańǵa qatysty kóp shaǵym túsetin edi. Qazir bári ózgerdi. Ádette búkil el boıynsha jylyna 30-dan 60-qa deıin beıbit jıyn uıymdastyrylatyn. Jańa zań qabyldanǵannan beri bir jyl ishinde Qazaqstanda 552 beıbit jıyn ótti», - dedi ol.

Saıasattanýshy beıbit jınalystardyń negizgi bóligi - jalǵyz pıketter ekenin tilge tıek etti. Ol Almatyda ótti.

«Bul - lıberalızm. Ol saıası belsendiliktiń úlken ósýimen rastalady: femınıster bar, janýarlardy qorǵaıtyn belsendiler bar, qarjy pıramıdalarynan zardap shegýshiler bar barlyǵy birtindep qoǵamdyq pikirge kóship jatyr. Bul óte jaqsy. Adamdar talap qoıa bastady. Bul bárimiz úshin óte mańyzdy, óıtkeni áleýmettik jáne saıası dıalog mádenıeti qalyptasyp jatyr», - dep qosty saıasattanýshy.

Eske salaıyq, Almatyda tanymal sarapshylar beıbit jınalystar týraly zańnyń nátıjesin talqylap jatyr.

Sharaǵa belgili qazaqstandyq sarapshylar, quqyq qorǵaýshylar, Ulttyq qoǵamdyq senim keńesiniń músheleri men Qazaqstan Respýblıkasy Prezıdentiniń kómekshisi, Ulttyq keńestiń hatshysy Erlan Qarın qatysty.

Baıandamada jańa zańnyń qoldanylýy azamattarǵa ózderiniń azamattyq pozıtsııasyn kórsetýge keń múmkindikter beretindigine nazar aýdarylady. Sonymen qatar, zań normalary boıynsha jańa oryndarda, qalalardyń ortalyqtarynda beıbit jınalystar ótkizý turǵyn halyqtyń kóp jınalýyna, buqaralyq aqparat quraldarynda jan-jaqty jarııa etýge jol ashty.