Saıasattanýshy: Parlamenttik saılaýǵa qatysty máseleler tek elordada talqylanbaýy kerek
Bul týraly ol Óskemen qalasynda ótken «Saılaý-2021: mańyzy men erekshelikteri» atty sarapshylar keńes otyrysynda málim etti.
«Óńirlerdegi osyndaı otyrystardyń mańyzy zor. Sebebi Parlament Májilisi depýtattarynyń kezekti saılaýyna qatysty máseleler elimizdiń bas qalasynda ǵana emes, aımaqtarda da talqyǵa salynǵany abzal. 10 qańtarda bolatyn saılaý erekshe rejımde ótkizilmek. Olaı deıtinim, bul saılaý koronavırýs pandemııasyna, álemdegi ekonomıkalyq daǵdarysqa tuspa-tus kelip otyr. Keıbir úmitkerler osyny paıdalanyp ádemi sózderdi, qurǵaq ýádelerdi úıip-tógýi múmkin. Sondyqtan halyq tańdaý jasar kezde barlyǵyn ekshep, oı eleginen ótkizýi kerek», - dedi Qazbek Maıgeldınov.
Onyń aıtýynsha, sońǵy 5 jyl ishinde qoǵamda saıası belsendilik artty. Biraq buǵan saıası mádenıettiń tómendigi sebep bolǵan. Sonyń saldarynan halyq áleýmettik jelidegi jalǵan aqparattarǵa jıi senip qalyp jatady.
«Qazir kim kóp laık jınasa, jurt sonyń pikiri durys eken dep oılaıdy. Tipti onyń jazǵany negizsiz bolsa da. Sol úshin Parlament Májilisine «popýlızmmen» aınalysatyn emes, realıstik kózqarastaǵy adamdar qajet. Demokratııa norma men protsedýralardan turatyndyǵyn umytpaıyq. Eger biz qandaı da bir normalarǵa baǵynbasaq, onda saıası beıberekettik týyndaıdy», – dedi saıasattanýshy.
Óz sózinde ol búginde memleket qoǵamnyń pikirin eskerip, zańǵa birqatar ózgerister engizgenin aıtty. Saılaýǵa qatysty jańa zańda da talaı jańashyldyqtar bar. Onyń ishinde ásirese saıası partııa qurý jáne tirkeýdiń jeńildetilgenin atap ótken jón.