Saıasattanýshy Nur Otan-daǵy memqyzmetshilerdiń qysqartylýyna pikir bildirdi

NUR-SULTAN. QazAqparat – «Nur Otan» partııasy bıyl jáne kelesi jyldary tikeleı daýys berý arqyly saılanatyn barlyq ákimshilik-aýmaqtyq birlikterdiń ákimi laýazymyna óz kandıdattaryn usynýǵa qabiletti. Tanymal saıasattanýshy, «Alternatıva» ózekti zertteýler ortalyǵynyń jetekshisi Andreı Chebotarev osyndaı pikir bildirdi.

Sarapshy óńirlerdegi partııalyq aktıvtiń jańartylýyna basa nazar aýdardy. Onyń pikirinshe, bılik partııasy ózin memlekettik basqarý júıesimen baılanystyrýǵa emes, oǵan qatysty baqylaýshy organ retinde áreket etýge tyrysady. Onyń kórsetkishi – barlyq deńgeıdegi saıası keńesterdegi memlekettik qyzmetshiler sanynyń eki ese qysqarýy jáne bıznes-qurylymdar, ÚEU, BAQ ókilderi jáne taǵy basqalary sanynyń artýy.

Onymen qosa, partııa janynan 1752 qoǵamdyq keńes qurylǵan, olarǵa qoǵamnyń patrııaǵa múshe emes ókilderi enip otyr. Onyń ishinde respýblıkalyq dárejege ıe 14-in parlamentarııler basqarady.

«Áleýmetti óz qataryna, ásirese basshylyq qyzmetterge jáne atalmysh keńesterge tartý halyq arasynda senimdi arttyrý jáne atqarýshy bılik organdaryna yqpala etý turǵysynan «Nur Otan» úshin mańyzdy», – dep jazdy Andreı Chebotarev Facebook-paraqshasynda.

Esterińizge sala keteıik, buǵan deıin «Nur Otan» tóraǵasynyń birinshi orynbasary Baýyrjan Baıbek óńirlerdegi partııalyq «qaıta júkteý» barysy týraly aıtyp bergen edi. Óńirlerdegi saıası keńesterdiń quramy 51%, bastaýysh partııa uıymdary basshylarynyń quramy 20% jańartyldy.