Saıasattanýshy Memlekettik hatshy laýazymy ne úshin aýystyrylǵanyn túsindirdi
«Ata zańǵa engizilgen ózgertýler men tolyqtyrýlarǵa sáıkes, Memlekettik hatshy laýazymy joıylyp, jańadan Memlekettik keńesshi laýazymy quryldy. Buǵan deıin aıtylǵandaı, 1995 jylǵy Konstıtýtsııaǵa engizilgen Memlekettik hatshy laýazymynyń qatań túrde belgilengen ókilettik aıasy bolǵan joq. Ár ýaqytta naqty bir tulǵaǵa baılanysty aıqyndalyp otyrdy. Ádette, Memlekettik hatshy qyzmeti ishki (keıde syrtqy) saıasatqa qatysty usynymdar ázirleýdi qamtıtyn. Erlan Qarın Memlekettik hatshy laýazymyna kelgennen keıin bul laýazymnyń negizgi qyzmeti retinde Prezıdentke ishki saıasat salasynda strategııalyq usynystar ázirleý bolyp aıqyndaldy. Bul syrtqy saıasat, qorǵanys ne bolmasa aıtalyq, sport máselelerine qaraǵanda aqylǵa qonymdy edi. Osy logıkaǵa súıener bolsaq, konstıtýtsııalyq reformalar toptamasynda Memlekettik hatshynyń mártebesi men qyzmetin naqtylaı túsý úshin onyń ataýyn Memlekettik keńesshi dep ózgertý usynyldy», - dep jazdy Danııar Áshimbaev Telegram kanalynda.
Onyń atap ótýinshe, Memlekettik keńesshiniń mártebesi men ókilettigi Prezıdenttiń osy jyldyń qańtarynda osy laýazymǵa aıqyndap bergen ókilettikpen birdeı. Ol Prezıdent, Úkimet basshysy, Parlament palatalary tóraǵalarynan keıingi memlekettik hattama ıerarhııasyndaǵy besinshi laýazymdy tulǵa bolyp qala beredi.
«Erlan Qarın birden jańa laýazymǵa qaıta taǵaıyndaldy. Osylaısha, ol Qazaqstannyń sońǵy Memlekettik hatshysy jáne Aqordanyń basty strategi retinde birinshi jańa Memlekettik keńesshisi boldy», - dedi ol.
Sonymen qatar Danııar Áshimbaev Ulttyq qoǵamdyq senim keńesiniń Ulttyq quryltaı bolyp ózgergenin, onyń alǵashqy otyrysy 16 maýsymda Ulytaýda ótetindigine nazar aýdardy.
Aıta keteıik, Qazaqstan Respýblıkasynyń Prezıdenti Qasym-Jomart Toqaev QR Memlekettik keńesshisiniń mártebesi men ókilettikterin aıqyndaıtyn Jarlyqqa qol qoıdy.
Al Memleket basshysynyń taǵy bir Jarlyǵymen Qazaqstan Respýblıkasy Konstıtýtsııasynyń 44-babynyń 19) tarmaqshasyna sáıkes Erlan Tynymbaıuly Qarın Qazaqstan Respýblıkasynyń Memlekettik keńesshisi laýazymyna taǵaıyndaldy.