Saıasattanýshy aldaǵy saılaýǵa qatysatyn partııalar jóninde pikir bildirdi
«Aldaǵy saılaýǵa qatysty qazir qandaı da bir boljam aıtý qıyn. Burynǵy brendpen jáne burynǵy basshylyqpen saılaýǵa tek «Aq jol» partııasy ǵana barady. Al, AMANAT partııasy osyǵan deıingi saılaýda «Nur Otan» dep atalǵany belgili. Onyń ataýy, basshylyǵy, aktıvi ózgerdi. «Qazaqstan halyq partııasy» da basshylyǵyn aýystyrdy, sondaı-aq ondaǵy kıkiljiń partııanyń bedeline nuqsan keltirdi dep sanaımyn. Sonymen qatar, saılaý qarsańynda qurylǵan eki jańa partııa paıda boldy. Dál qazir olardyń saılaý aldyndaǵy strategııasy qandaı bolatynyn, qandaı aktıvke ıe bolatynyn baǵalaý qıyndaý», - dedi D. Áshimbaev.
Onyń pikirinshe, tájirıbesi men resýrstyq bazasyn eskersek, AMANAT partııasy jeńiske jetýi múmkin. Partııanyń ilgerileýine kóptep jumyldyrylǵan belsendiler, Májiliste jumys istegen fraktsııa, sondaı-aq kópshilikke tanymal basshylyǵy óz áserin tıgizedi.
«Ekinshi orynǵa «Aq jol» partııasy shyǵady dep oılaımyn. Óıtkeni, olardyń baǵyty belgili jáne el arasynda tanymal bolyp tur. «Qazaqstan halyq partııasyna» qatysty naqty aıtý qıyndaý. Partııalyq tizimi de aıtarlyqtaı optımızmmen qaraıtyn deńgeıde emes. Buǵan deıin Parlament depýtattaryn saılaýda «Aýyl» partııasynda eleýli jetistik bolmaǵan edi. Al, partııa atynan usynylǵan jańa tizimdi osyǵan deıin prezıdenttik saılaý naýqanyndaǵy eki eks-kandıdattar – Jıgýlı Daırabaev pen Qaraqat Ábden bastap otyr. Olar byltyr kúzdegi saılaý kezinde saılaýshylar arasynda biraz tanylǵan adamdar. Atap aıtqanda, «Aýyl» partııasy óziniń kórsetkishterin jaqsarta alady, biraq qanshalyqty ilgerileıtinin aıtý qıyn», - dedi saıasattanýshy.
Onyń sózine qaraǵanda, jańadan qurylǵan Respublica jáne BAYTAQ partııalary kandıdattarynyń tizimderinde tanymal adamdar bolǵanymen, aıtarlyqtaı áser qaldyrmaı tur.
Sonymen, saıasattanýshy saılaýda aldyńǵy qatardan kórinetin partııalardy tizip berdi. Olardyń arasynda AMANAT, «Aq jol», «Aýyl», «Qazaqstan halyq partııasy» jáne «Jalpyulttyq sotsıal-demokratııalyq partııasy» bar.
Eske salsaq, Májilis depýtattaryn kezekten tys saılaý 19 naýryzda ótedi.
Ortalyq saılaý komıssııasyna 4 saıası partııa, sondaı-aq Respublica, Amanat, jáne «Aýyl» partııalary Májilis jáne máslıhattar depýtattary saılaýyna qatysty qujattardy usyndy.
Buǵan deıin Ortalyq saılaý komıssııasy Májilis pen máslıhat depýtattaryn saılaýdyń kúntizbelik josparyn bekitken bolatyn.
Foto: facebook.com/adaniyar