Saıasatkerler men kásipkerler Ulttyq ǵylym akademııasynyń quramyna kirmeıdi – Aqylbek Kúrishbaev
«Ǵylym ordasy» ǵımaratynda jańadan saılanǵan akademıkterge dıplomdar men tósbelgilerdi tapsyrý rásimi ótti. QR Prezıdenti janyndaǵy QR Ulttyq ǵylym akademııasynyń prezıdenti Aqylbek Kúrishbaevtyń aıtýynsha, qazirgi álemde órkendeý men laıyqty básekelesý úshin, ǵylym pragmatıkalyq jáne nátıjeli bolýy kerek.
«Bizdiń mıssııamyz – elimizdiń jetekshi ǵalymdaryn biriktiretin avtonomdy, táýelsiz jáne dástúrli bıýrokratııalyq vertıkaldan tys, memlekettik saıasat pen ekonomıkanyń neǵurlym ózekti máselelerin sheshýge úles qosa alatyn qazaqstandyq ǵylymnyń damýyn qamtamasyz etetin ǵylymı uıym qurý», – dedi ol.
Memlekettik akademııanyń ereksheligi – ol akademık ataǵy «mansap tájin» bildiretin nemese zeınetke shyǵýdyń jaıly orny retinde qarastyrylyp kelgen erekshe mártebeli uıym bolmaıdy.
«Biz onyń quramyna qoǵam qaıratkerlerin, saıasatkerlerdi, memlekettik qyzmetkerlerdi nemese tabysty kásipkerlerdi almaımyz. Bizdiń mindetimiz – ǵylymnyń tek belsendi kóshbasshylaryn, naǵyz ǵalymdardy, onyń ishinde daryndy jastardy biriktirýdi jáne olardyń elimizge eleýli paıda ákelýine múmkindikter jasaýdy kózdeımiz», – dep atap ótti Kúrishbaev.
Aıtýynsha, qoldanystaǵy zańda kórsetilgendeı, akademık ataný – tek konkýrs negizinde saılaý arqyly júzege asyrylady. Qazaqstan Respýblıkasy Prezıdenti janyndaǵy Ulttyq ǵylym akademııasynyń tolyq múshesi ataǵyn ıelenýdiń basqadaı joly zańda joq.
«Osy rette, Qazaqstan Respýblıkasy Prezıdenti janyndaǵy Ulttyq ǵylym akademııasynyń naqty músheleriniń sandyq quramy kóp bolmaıtynyn atap ótkim keledi. Ádil saılaý negizinde elimizdiń eń laıyqty, eń dańqty ǵalymdary ǵana akademık bolýy kerek. Biz akademıkter qataryn jasandy «ósirýge» tıisti emespiz. Tipti, damyǵan ozyq elderdiń ózinde ǵylymı potentsıaly joǵary bolýyna qaramastan, ulttyq akademııalardyń tolyq músheleriniń sany shekteýli. Eger de biz, álemde akademıkter sany boıynsha birinshi orynǵa shyqsaq ta, budan ǵylymymyz órkendep ketpeıdi», – dedi QR Prezıdenti janyndaǵy QR Ulttyq ǵylym akademııasynyń prezıdenti.