Saıasat sańlaǵy

ASTANA. QazAqparat - Jaqynda muhıttyń arǵy jaǵynan jaqsy habar jetti - Qazaqstan Respýblıkasy Birikken Ulttar Uıymy Qaýipsizdik Keńesiniń turaqty emes músheligine saılandy, sóıtip 2017-2018 jyldarda álemniń eń kúrdeli máselelerin qarastyratyn, sheshetin orny bólek on bes eldiń qataryna qosyldy. Bul týraly «Egemen Qazaqstan» gazettinde belgili memleket jáne qoǵam qaıratkeri Qanat Saýdabaev Elbasy týraly óziniń tolǵanystaryn ortaǵa salady.

Týǵan elimiz jańa bir bıigine jetken saıyn maqtanamyz, marqaıamyz, halqymyzdyń tabysyna qýanamyz. Ondaıda aldymen oıymyzǵa Elbasymyz oralady. Nursultan Nazarbaev esimi búginde eldiktiń bir balamasyna aınalǵan. Bul tamasha tabysta da osy shırek ǵasyrlyq tarıhymyzda eldi bir asýdan bir asýǵa abyroımen asyryp kele jatqan Prezıdenttiń eńbegi erekshe. Sondyqtan da men ómirimniń bir belesine shyqqaly turǵan osy tusta el gazetiniń mol múmkindigin paıdalanyp, táýelsizdik tarıhynda da, óz taǵdyrymda da bólekshe oryn alatyn asyl tulǵa týraly keıbir oılarymdy ortaǵa salýdy jón kórdim. Meniń ózimdi baqytty jan sezinetinimniń basty sebebi - jas memlekettiń jańadan qaz basyp, qalyptasyp jatqan shaǵyndaǵy alǵashqy adymdarynan búgingi qaryshty qadamdaryna deıingi júrip ótken jolyndaǵy eń eleýli oqıǵalardyń báriniń derlik basy-qasynda bolǵandyǵym, talaı mańyzdy sheshimderdiń qabyldanýyna kýá ekendigim. Syrtqy ister mınıstrliginiń alǵashqy jetekshileriniń biri retinde de, birqatar beldi elderde elshi qyzmetin atqarǵan, Úkimet keńsesin basqarǵan adam retinde de, ár kezeńde ártúrli jaýapty mindetter júktelgen joǵary laýazym ıesi retinde de ótken jyldardy oısha sholýdyń, Elbasymyzdyń el ómirindegi orny jaıynda tolǵanýdyń oraıy kelip turǵandaı. Ondaǵy maqsatym - eldiń el bolyp qurylýyn, táýelsizdikke qol jetkizýin, ulttyń uıysýyn qamtamasyz etken, sóıtip álem tarıhynda  uly prezıdentter retinde tanylatyn tulǵalardyń tyndyrǵan eńbegin aınalasy jıyrma bes jyldyń ishinde atqarǵan Elbasymyzdyń bıik baǵasyn bilgize túsý.

Amerıka Qurama Shtat­taryn­daǵy Qazaqstannyń Tótenshe jáne ókiletti elshisi qyzmetine taǵaıyndalǵannan keıin sol eldiń arǵy-bergidegi pre­zı­­dentteri, olardyń ómiri men qyz­meti ja­ıynda málimetter jı­nas­tyrýǵa tapsyrma berdim. Gazet-jýrnal maqalalarynyń ushy­ǵyna jetý múmkin emestigin ja­q­sy bil­gen­dik­ten, áýelgi bette tek kitap­tar­dy, sonyń ózin­de de eń aıtýly kitaptardy qaras­tyrýdy aı­tqan­myn. Sóıtsem, shyn máninde, onyń ózi de eshkim ıgere almaıtyn sharýa eken. Oılap qara­ńyz, tek Fran­­klın Rýzvelt jáne onyń «jańa baǵyty» jóninde 1300 mono­gra­fııa jazylyp, 800 dısserta­tsııa qor­­­ǵalǵan! Amerıkanyń saılaý ót­­kize bastaǵaly bergi tarıhynda bı­­lik­­tiń ushar shyńyna 43 adam kóteril­­genin eskersek, prezıdentter týra­ly ja­zyl­ǵan ádebıettiń aýqy­myn ıge­rý múmkin emestigi anyq kórinedi.

Qazaqstan Respýblıkasynyń Tuń­ǵysh Prezıdenti Nursultan Ábishuly Nazarbaev týraly osy maqala­nyń bastaýynda  jalpy prezı­dent­tik ınstıtýty, onyń mán-ma­ǵy­nasy, mártebesi jóninde birer aýyz áńgimelep alýdyń jóni bar dep oılaımyn. Prezıdent sózi­niń (latynsha - praesidens) basshy, aldyńǵy qatarda otyratyn adam degen maǵyna beretini belgili. Bul laýazym respýblıkalyq úlgi­de qurylǵan elderdegi memle­ket basshysynyń ınstıtýty retinde ábden ornyqqan. Prezıdent óki­let­tiligi ár eldiń kólemine, salma­ǵy­na qaramastan, barlyq mem­leket­terde bir-birine negizinen uq­sas bo­lyp keledi. Mysaly, Qazaq­stan Respýblıkasynyń Kons­tı­tý­tsııa­syn­da Prezıdent memleket­tiń bas­shysy, memlekettiń ishki jáne syrt­qy saıasatynyń negizgi baǵyt­taryn aıqyndaıtyn, el ishinde jáne halyq­aralyq qatynastarda Qazaq­stannyń atynan ókildik etetin eń joǵary laýazymdy tulǵa, halyq pen memlekettik bılik bir­li­gi­niń, Kons­­tıtýtsııanyń myzǵymasty­ǵy­nyń, adam jáne azamat quqyqtary men bostandyqtarynyń nyshany ári kepili dep belgilengen, bul qyz­met­­tegi adam bıliktiń bar­lyq tar­ma­ǵy­­nyń kelisip jumys is­teýin jáne óki­met organdarynyń halyq aldyn­da­ǵy jaýapkershiligin qam­tama­syz ete­di. Ózge elderdegi pre­zıdenttik ıns­­tı­­týt­­tyń sıpattary da osyǵan qaraılas.

Tarıh kóshi ýaqyt óte kele jyldamdaı túsetini málim. Zertteý­shiler HH ǵasyrda adamzat onyń aldyn­daǵy birneshe ǵasyrlarda, burynǵy myńjyldyqtarda júrgen jolynan ótti dep sanaıdy. Al sol ǵasyr­dyń sońǵy onjyldyǵy men jańa ǵasyrdyń basynda adamzat kerýeni tipti de jyldamdaı tústi.

1991 jyldyń 1 jeltoqsa­nyn­daǵy tuńǵysh saılaýdan keıin Prezıdent týǵan halqynyń aldynda: «Dana babalar dástúrimen osy saltanatty sáttegi sózimdi aldymen atajurtyma, qasıetti halqyma arnaımyn! Búgingi kún - Qazaq eli­niń shejiresine máńgi enetin kún. Tarıhtyń talaı buralań belesinen ótip, bul kúnge de jetip otyrmyz. Bárin de kórgen halyqpyz, bárine kóngen halyqpyz. Shúkir, kesh­teý de bolsa es jıyp, eńse kóterip, egemendi eldiń týyn tige bas­ta­dyq. Qazaq Respýblıkasynyń Pre­zı­dentin búkil halyq saılaǵany - osy joldaǵy eń bıik belestiń biri. El­diń qamyn oılaıdy, namysyn jibermeıdi dep biraýyzdan senim artqandaryńyz úshin shyn júrekten alǵysymdy aıtamyn. Elim úshin, halqym úshin, Qazaq­stanym úshin tarıhtyń qaı sy­na­ǵyna da táýekel dep bas tigýge daıynmyn. Bul jol­da eń aldymen dana halqyma, dar­qan elime, ata-babanyń arýaǵyna súıe­ne­min. Tarıh kóshi uzaq. Asyqsaq ta ap­tyq­paıyq. Qazaqstannyń kóp ultty halqynyń juldyzy joǵary bolatynyna, týǵan elimizde dáýletti de sáý­letti ómir ornaıtyny­na kámil sene­min. Senimnen aıyrylmaıyq, baýyr­larym!» dep aqtaryla aıtty.

Bul senimniń arqaýy nede edi? Bar­­shamyzdyń baǵymyzǵa aınal­ǵan ba­qyt­ty taǵdyrdyń bastaýy qandaı edi?

«Shóp te shyqqan jerine shyǵa­dy» deıdi halqymyz. Osy tur­ǵy­­­dan qaraǵanda Elbasymyzdyń arǵy atasy aty bir taıpaly eldiń ura­ny­na aınalǵan Qarasaı batyr bo­la­tyny tipti de tegin emes deımiz.

Bolashaq Prezıdenttiń anasy Áljan apamyz ánshi ári sheshen kisi bolǵan.  Prezıdenttiń ákesi Ábish óz ákesi Nazarbaı bıden úsh jasynda qalyp, jastaıynan jetimdik ómirdi bastan keshken. Ol kisiniń de ánge áýes, kúıge qumar bolǵany, maqaldap, máteldep sóı­leıtini zamandas­tary­nyń áńgime­lerinen belgili.

Jyldar boıy ańsap júrip kórgen Nursultanynan kóp úmit kútken áke balasynyń taýdaı talabyn udaıy ushtap, qanat­tan­dyryp otyrǵan.

Osy jyldarda bolashaq Prezı­denttiń kelisti kóringen qasıetter­i­niń arasynda bireýin ǵana bóle-jara ataýǵa týra kelse, onda namys­­qoı­lyqty, ulttyq namysty ataǵan jón bolatyn sııaqty. Jal­py, Nursultan Nazarbaevtyń búkil ómir joly ult namysyn tý etip ustaýdan turady deýdiń artyq­tyǵy joq. Qaı jerde de, qaı kezde de Elbasymyz qazaqtyń qanyn, qazaqtyń janyn tanytyp, ultty udaıy alǵa umtyldyrýmen keledi. Osynyń bárinde de eń aldy­men óziniń úlgi-ónegesin kór­setýmen keledi.

1979 jyldyń jeltoqsanynda Nursultan Ábishuly Qazaqstan Kompartııasy Ortalyq Komı­teti­niń ónerkásip jónindegi hatshysy bolyp saılandy, sóıtip búkil Keńes Oda­ǵyn­daǵy óz deńgeıi boıynsha eń jas hat­shyǵa aınal­dy. Nursultan Ábishuly Alma­tyǵa kelgen betten as­­ta­­na­lyq bıýro­kratııanyń orta­synda qabyl­danǵan qasań qalyp­tar­dyń bárin qaqyratyp, ishki jan dúnıesi­niń erkindigimen, aralas-quralas­­tyq­qa jaqyndyǵymen, oı azattyǵy­men, ádebıetke, ónerge shyn­a­ıy qyzy­ǵatyndyǵymen oqshaý kórin­di, onyń áriptesteri ó­zderi­niń qyzmet múddelerinen bas­qa jaılarǵa atymen nazar aýdar­­maıtyn. Árıne, Ortalyq ko­mı­­tet­tiń jas hatshysynyń bul bitimi, ásirese, shyǵarmashylyq zııa­ly qaýymnyń kóńiline birden jaq­ty, óıtkeni olar ózderin dáıim bılik basyndaǵylardyń nazary­nan tys qalǵanbyz dep sanaı­tyn, sodan da Nursultan Ábish­uly­na qurmetpen qarady. Teginde, sol tusta res­pýb­lıkanyń joǵary bas­shy­lyǵy­nyń arasynan kon­tsertterge, spek­taklderge udaıy baratyn, tipti sýret­shiler­diń sheberhanalarynda da bolyp turatyn, artıstermen, jazýshylarmen etene sóılesetin jalǵyz adam Nazarbaev edi deýdiń de artyqtyǵy joq. Shyǵarmashyl qaýym úshin ónerkásip salasyn basqaratyn hatshynyń Abaı jyr­laryn, osy zamanǵy qazaq aqyn­dary­nyń óleńderin jatqa biletini, dombyra tartyp, án shyrqaıtyny ǵajap qalarlyq jaǵdaı edi. Taǵy bir aıryqsha aıtatyn jaı my­naý: Qazaq­standaǵy partııalyq jáne úki­mettik jetekshilerdiń ara­syn­­daǵy ana tilin sonshalyqty jetik biletin az adamnyń bireýi de Nazarbaev bolatyn. Munyń ózi tań­­da­narlyq. Iá, Nazarbaev qazaq mek­tebin bitirgen, biraq sonaý 1958 jyl­dan Ortalyq komıtettiń hat­shy­lyǵyna saı­lanǵan 1979 jylǵa deıin ol is júzinde ana tili­niń aıasy­nan syrtta boldy. Dneprodzer­jıns­kide de, Temirtaýda da, Qaraǵan­dy­da da, Almatyda da resmı til, qarym-qaty­­nas tili orys tili edi. Respýb­lı­kalyq jıyn-jınalystarda ál­de­bi­reý qazaqsha sóıleı qalsa, aldyn ala daıyndalǵan nomer sııaqty kóri­­nip turatyn. Meniń­she, ana tili­niń son­­shalyqty kemsi­­tilip kel­geni­ne ja­ny­nyń qına­lysy keıinnen Nur­sultan Ábishuly­nyń qazaq tilin qatty qoldaýy­nyń basty bir sebe­bine aı­naldy. Sonymen qatar, Prezı­dent bul qoldaýdy orys tiliniń keń múmkin­digin molynan paıdalanýǵa nuqsan keltirmeıtindeı etip jasaı bildi.

Almatyǵa kelgennen keıingi alǵash­qy jyldyń ózinde Ortalyq komıtettiń jańa hatshysy óziniń biliktiligimen, istiń jaıyn tereń tal­daýymen, erekshe eńbek­qor­ly­ǵy­men, prıntsıp­tiligimen, asa qýat­ty jadymen, adamdarmen til tabysa bilýimen, bólekshe tartym­dy­lyǵy­men ózi basqaratyn ónerkásip, kólik pen baılanys salasy qyzmet­ker­leri­niń ǵana emes, ǵylymı, shy­ǵar­­mashylyq ıntellıgentsııanyń ara­synda da aıryqsha bedelge ıe boldy. Sondyqtan da D.A.Qonaev oǵan Ortalyq komıtettiń ıdeologııa boıynsha hatshysyna tıesili tapsyr­malardy da jıi berip tura­tyn. Mysaly, N.Tilendıev bas­qara­tyn folklorlyq «Otyrar sazy» orkestriniń Máskeýdegi esepti kon­tsertin uıymdastyrý jáne ótkizý máselesin Nursultan Ábishuly tike­leı úılestirip otyrdy. Ol kon­tsert Nurǵısa Tilendıevke Keńes Oda­ǵy­nyń halyq artısi ataǵyn berý jónin­degi máselege oraılas­tyryl­­ǵan bolatyn. Tamasha ótken kontsert­ten keıin kóp uzamaı asa kórnekti talant ıesine KSRO halyq artısi ataǵy berildi.

Qazaqstanǵa KSRO Ǵylym akade­mııasynyń prezıdenti, keńestik atom bombasyn jasaý isiniń basynda turǵan asa kórnekti ǵalym, úsh márte Sotsıalıstik Eńbek Eri A.Alek­sandrov kelgen kezde de ony qar­sy alǵan, is-sharalardyń bárin uıym­dastyryp, shyǵaryp salǵan Nursultan Ábishuly boldy. Keńes Oda­ǵynyń bas basylymy «Pravda» gazeti­niń bas redaktory, akademık V.G.Afanasevtiń Qazaqstanǵa saparynyń baǵdarlamasy da Nursultan Ábishulynyń tikeleı baqy­­laýymen ótti. Bul jumys­tardyń bári qyzmettik mindeti boıynsha ıdeo­­logııa jónin­degi hat­shynyń aı­na­ly­satyn sharýa­sy ekeni tú­sinik­ti. Munyń ózi sol kezde-aq N.Nazarbaev­­tyń ıntel­lektýaldyq jáne uıym­das­ty­rýshylyq áleýeti ózi bas­­qa­ratyn sala­nyń aýmaǵynan anaǵur­lym asyp túsip jatqanyn kórsetedi.

Nursultan Ábishulynyń Úki­met­tiń keńeıtilgen otyrysynda alǵash ret Mınıstrler Keńesiniń Tóraǵasy retinde sóılegeni meniń áli kúnge esimde. Qylshyldaǵan qyryq jasyn­da, kelisti túr-tul­ǵasy jan-jaǵyna  qýat shashyp turǵan shaǵynda ol res­pýb­lıkadaǵy istiń jaıyn egjeı-teg­jeıine deıin biletin, alǵa qoıyl­ǵan maqsattardy da, soǵan qol jetkizetin joldardy da aıqyn kórip turǵan, qýatty, ózine senimdi basshy retin­de kórindi. Sol kezdiń ózinde-aq Nazarbaev keıinnen shyn máninde álemdik aýqymdaǵy lıder sıpatynda tanylatyn qasıetterin  jarqyrata ashyp salǵan edi. Úkimettiń sol oty­rysynan keıin kópten jumys isteıtin mınıstrlerdiń biri: «Naǵyz isker basshy keldi, endi erkeligimizdi kótere qoımaıdy» degeni esimde. Qudaıǵa shúkir, N.Á.Nazarbaev sodan bergi otyz jyldan astam ýaqyttyń ishinde Qazaqstanǵa qaltqysyz qyzmet etip, eldi isker basqarýdyń úlgisin tanytyp otyr.

Kóptegen jyldar boıy álemniń birqatar beldi astanalarynda - Máskeýde, Ankarada, London men Vashıngtonda Qazaqstan elshisi minde­tin atqaryp, táýelsizdik tusyn­da eldiń syrtqy saıasat vedomst­vo­syn eki ret basqarǵan adam retin­de men Qazaqstannyń álem­degi qazirgi qurmetine qol jetkizý N.Nazarbaevqa qandaı­lyq kúshke túskenin jaqsy bilemin. KSRO ydyraǵannan keıin Qazaq­stan túıindi máseleleri eń kóp elge aınalǵan bolatyn. Ol kezde álemdik sarapshylar Qazaq­stannyń egemen el retinde saqtalyp qalý-qalmaýyna baı­lanysty qara aspandy tóndirip sóıleıtin, solaı sóıleýge obek­tıvti sebepter de barshylyq edi. Keńestik respýblıkalardyń bir­qatarynda kóptegen etnosaralyq qaq­tyǵystar órship, qan tógilip jat­ty, kópetnosty Qazaqstanǵa on­daı qaýip ábden-aq tónip turǵan bola­tyn. Aral teńiziniń tartylýy men Semeı atom polıgonyndaǵy ahýal sııaqty qoldan jasalǵan apat­tar qoǵamnyń kóńil-kúıine qatty áser etetin.

Tóten qıyndyqtarmen betpe-bet kelgen el ekonomıkasy jar jaǵa­syna tirelip turǵan edi. Óner­kásip óndirisi eki esege, aýyl sharýa­shylyǵy úsh esege quldyrap ketti. Kásiporyndar toqtap, jumyssyzdar qatary qalyńdady. Qazaqstandy Ortalyqtyń shıkizat shylaýy dep tegin aıtpaıtyn, respýblıka ekonomıkasynyń 93 paıyzy odaqtyq baǵynysta bolatyn. Osyndaılyq asa qaýipti jaǵdaıda Prezıdenttiń ár qadamy erekshe dáldikpen jasalýǵa tıis-tin. Solaı jasaldy da. Bizdiń kópetnosty úıimizde tatýlyq pen kelisim, birlik pen túsinistik ornady.

Sırek kezdesetin strategııa­lyq oıta­nymynyń, tańqalarlyq ıntýı­­tsııa­synyń, dıplomatııalyq talanty men aıryqsha jumys isteý qabiletiniń arqasynda Nursultan Nazarbaev eldegi jaǵdaıdy baqy­laýda ustap qana qalǵan joq, sonymen birge eldi áleýmettik-ekonomıkalyq damýdyń birte-birte júzege asatyn, biraq senim­di traektorııasyna alyp shyǵa bildi, bul úshin qajetti qolaıly syrt­qy jaǵdaılardy, eń aldymen halyq­aralyq qoǵamdastyqtyń senimin qamtamasyz etti.

Men bul oraıda syrtqy saıasat Memleket basshysynyń erekshe nazarynda turatyn sala ekenin qadap aıtqym keledi. Ony júzege asyrýdyń tetigi - Syrtqy ister mı­nıstr­ligi, júzege asyrýshylary - Pre­zı­dent taǵaıyndaıtyn elshiler.

Elshi jáne Syrtqy ister mı­nıstri retinde táýelsizdiktiń alǵash­qy kúnderinen bastap men Pre­zı­denttiń shet memleketter men úki­met­ter basshylarymen, kóptegen trans­ulttyq korpora­tsııalardyń jetek­shilerimen júr­gizgen kelissóz­deri­niń kýágeri bol­dym. Sol alǵash­qy kezdesý­ler­diń ózinde-aq áli eshkim­ge bel­gi­siz eldiń Prezıdenti tulǵa­lyq qadir-qasıetimen, kelissóz ar­qaýyna aınalǵan máselelerdi tereń bilýimen, senimdiligimen jáne sırek kezdesetin adamdyq aıaý­ly­­ly­ǵymen kelissóz ústeliniń ba­syn­daǵy basshy­lardyń qurme­ti­ne bólenip, senimin ıelenetin.

Nursultan Nazarbaev Prezı­dent retinde ǵana emes, eń aldymen adam retinde Qazaq­stan­nyń álem sene­tin Tuńǵysh Brendine aınaldy, jyl ótken saıyn ol bul senimdi art­tyrǵan ústine arttyra tústi.

Osynaý 25 jyldyń ishinde N.Nazarbaev beldi memleketter bas­shy­larynyń birneshe býynymen istes boldy, solardyń bárimen de ol laıyqty, teń dárejeli ári senimge qurylǵan, talaı rette tipti dostyq qarym-qatynas ornata aldy, bul qatynastar jańaǵy jetekshiler óz qyzmetterinen ketkennen keıin de jalǵasyp jatady. Olardyń arasynan búginde marqum bolǵan B.Eltsın, Lı Kýan ıÝ, S.Demırel, qazirgi Tszıan Tszemın, úlken Dj.Býsh, B.Klınton, M.Mohammad jáne basqalar bar. Búginde bizdiń Prezıdentimiz álemdik saıasattyń barsha jurt moıyndaǵan patrıarhy, sóıte tura jańa býyn lıderleri onyń óte jany jas jáne osy zamanǵa beıim tulǵa retinde saqtalǵanyn atap aıtady. Solaı bolǵandyqtan da ol jańa formatsııa lıderleri - V.Pýtınmen, Sı Tszınpınmen, B.Obamamen dostyq sıpattaǵy áriptestik qatynas ornata aldy.

Prezıdenttiń eldiń áleýmettik-ekonomıkalyq damýyn qamdaý, Qazaq­stannyń halyqaralyq arena­daǵy bedelin nyǵaıtý, óńirlik jáne jahandyq qaýipsizdikti qamtamasyz etý jónindegi kóp jylǵy, tabandy, jasampaz qyzmetiniń arqasynda Eýropadaǵy qaýipsizdik pen ynty­maq­tastyq uıymyna múshe bolyp tabylatyn 56 memleket Qazaq­stan­nyń osy bedeldi halyqaralyq uıymǵa tóraǵalyq etýin qoldady. Elbasynyń:  «Osynaý tarıhı sheshim táýelsiz Qazaqstan jetistik­teri­niń ádil baǵasy bolyp tabyla­dy. Búginde Qazaqstan jahan­dyq qaýip­sizdiktiń belsendi qatysý­shy­syna, beıbitshiliktiń, kelisim men turaq­tylyqtyń bastaý kózine aınaldy. Óziniń ádildikten taımaıtyn salty­na adal qazaq halqy osyndaı qadir­mendi Uıymnyń Sammıtin Azııa el­deriniń jáne postkeńestik mem­le­ket­terdiń arasynda birinshi bolyp qabyldap otyr. Mundaılyq tany­lýǵa buryn Qazaqstan eshqashan qol jet­kizip kórgen emes edi» degen sózi bul sheshimniń elimiz úshin qandaı­lyq tarıhı mańyzy bar ekenin aıshyqty ashady.

Nursultan Nazarbaevtyń qaı­ran qaldyrarlyq qaırat-qýaty, tereń erýdıtsııasy, tabandy saıası kúsh-jigeri men dıplomatııalyq sheberligi Qazaqstannyń EQYU-nyń 11 jyldan beri ótpeı kele jatqan Sammıtin tamasha ótkizýge jáne 56 memlekettiń barlyǵynyń EQYU-nyń tarıhı Astana Dek­la­ratsııasyn qabyldaýyna qol jet­kizdi. Bul shynynda da Qazaq­stan­nyń juldyzy janǵan shaǵy, N.Á.Nazarbaevtyń laıyqty jeke trıýmfy, qazaq halqynyń ulyly­ǵy­nyń, qazaqstandyqtardyń bir­ligi men toptasqandyǵynyń búkil álemge jarqyraı kórinýi edi.

Osyndaı juldyzymyz janǵan sha­qtarymyz kóp bizdiń. Prezı­dentimizdiń týǵan halqynyń jáne álemniń aldyndaǵy shyn mánindegi tarıhı jetistikteriniń qatarynda Semeı ıadrolyq polıgonyn jabý, ıadrolyq arsenaldan óz erkimen bas tartý, Azııadaǵy ózara is-qımyl jáne senim sharalary jónindegi keńes qurý, qazaq halqynyń kóp ǵasyr­lyq tarıhynda eldiń memle­kettik shekarasynyń halyqaralyq-quqyqtyq mártebesin retteý, táýel­siz memlekettiń jańa elordasyn salý, 2017 jyly EKSPO kórmesin uıym­dastyrýǵa, 2017-2018 jyldar­da Birikken Ulttar Uıymy Qaýipsizdik Keńesiniń turaqty emes músheligine saılanýǵa qol jetkizý sııaqty asa iri tabystardy aıtýǵa bolady.

Eń bastysy - osy jyldardyń bárinde bizdiń ortaq úıimizde tatýlyq pen kelisim, birlik pen ózara túsinistik saqtalyp, qazaq­standyqtardyń basty quqy - laıyqty ómir súrý quqy qam­ta­masyz etilip keledi. Pre­zı­dent bul jóninde: «Qazaqstan úshin ekonomıkalyq tabystar men qoǵamdyq ıgilikti qamtamasyz etýdiń kókeıge qonymdy úılesimin tabýdyń ómirlik mańyzy bar. Men ózimniń túıindi maqsatym osy dep bilemin» dep aıtqan bolatyn.

Kóshbasshymyzdyń osy jyldar ishindegi barsha ıgi nıeti men isker qyzmeti el azamattarynyń ál-aýqa­tyn arttyrýǵa, memlekettiń qaýip­siz­digin nyǵaıtýǵa, álemdegi bedelin kúsheıtýge tabandy ári dáıekti túrde baǵyttalyp keledi. N.Nazarbaevtyń shyn mánindegi álemdik aýqymdaǵy lıder eken­diginiń, onyń halyqara­lyq asa bıik bedeliniń naqty dálel­deri qataryn­da bizdiń Prezı­denti­mizdiń 2010 jylǵy qyrǵyz da­ǵ­da­rysyn, Iran ıadrolyq baǵdar­la­ma­syn, taıaýdaǵy Reseı-Túrkııa araz­dy­ǵyn retteý jónindegi tıimdi is-áre­ket­­terin ataýǵa bolady. Búgingi­deı san túrli senimsizdikke, kereǵ­ar­lyq­qa jáne qaqtyǵystarǵa toly álem­de mundaılyq asa qıyn gýma­­nıs­tik mıssııa basqa eshkimniń de qoly­­nan kelip otyrǵan joq, qazaq­stan­­dyq­tar muny oryndy maqtan etedi.

Memleketimizdiń kúsh-qýaty men myǵymdyǵy, onyń bolashaqtaǵy ilgeri basýynyń kepili Kóshbasshy men Ulttyń myzǵymas birliginde. Álem burynǵydan qaýipsizdeý, burynǵydan jaqsylaý bolmaı turǵan qazirgideı kezde qazaq­stan­dyqtar bul aqıqatty sergek sezinedi. Sozy­lyp bara jatqan ekonomıkalyq daǵ­darys eń jaǵ­daıy durys degen el­derdiń ózinde adamdardyń ál-aýqa­tyna eleýli túrde áser etýde. Ár jer-ár jerde soǵys oty órship, ondaǵan myń adamdar qurban bolýda, mıl­lıon­daǵan adam bosqynǵa aınalyp, kóptegen elderdiń sıpatyn ózger­tip jatyr. Bul má­se­le­­ler­di ult­shyl­dyqtyń, dinı tózim­­siz­diktiń jáne ekstremızmniń ushynýy, memleketterdiń bloktarǵa bólinip alyp qarsylasýy sııaqty shetin jaılar odan saıyn aýyrlata túsýde. Alaıda, Qazaqstanda bel­gi­li qıyndyqtarǵa qaramastan, Mem­­­leket basshysynyń kóp jyl­darǵy dáıekti ekonomıkalyq saıa­satynyń arqasynda áleýmettik baǵdarlamalar shektelmeı, aza­mat­­tarymyzdyń ál-aýqaty nashar­­lamaı otyr. Munyń ózi el halqy­nyń jaǵ­daıyn Prezıdenttiń udaıy nazar­da ustaýynyń arqasy.

Qazaqstan óz táýelsizdiginiń 25 jyl­dyǵyna jańa ǵana jetti, tarıh úshin bul qas-qaǵym sát, al jań­­ǵyr­týlardyń túbegeıliligi men te­reń­digin eskergende bul jyl­dar tutas dáýirge teń, sondyq­tan da ol kóp qıyn­dyq kórgen, óz mem­le­­ket­­ti­ligine qaıtadan qol jet­kiz­gen qazaq halqynyń Jań­ǵy­rý Dáýi­ri atalýda. Munyń ózi 1991 jyl­ǵy 1 jeltoqsanda, myńjyl­dyq­­tar mejesinde, álemdegi tek­to­nı­ka­lyq yǵysýlar belesinde qazaq­stan­dyq­tardyń óz taǵdyry men el taǵdyryn Nursultan Nazarbaevqa senip tap­syr­ǵanynyń arqasynda múmkin bolyp otyr. Osy jyldar ishinde qazaq­standyqtar zor qurmet­pen Elbasy ataǵan Nursultan Nazarbaev óz hal­qynyń senimi men úmitin to­lyq aqtap keledi, týǵan elin beı­bit­­shilik pen progress jolyna senim­­di ári taban­d­y túrde bastap keledi.

Elbasymyzdyń synnan ótken kóshbasshylyǵynyń arqasynda bizdiń halqymyzdyń alda áli talaı asýlardan abyroımen asatynyna kúmán joq.

Sondyqtan da men úshin Nursul­tan Nazarbaevtyń Qazaqstan­nyń jańa tarıhyndaǵy eń mańyzdy jáne taǵdyrsheshti oqıǵalar­dyń qatysýshysy jáne kýágeri bolý múmkindigin syılaǵanynan, kúshim, múmkindigim jetkeninshe osy jyldar ishinde týǵan elime paı­daly bolý baqytyn bergeninen artyq  eshteńe bolmaq emes. Ómi­rim­niń keshegi, búgingi jáne er­teń­gi asqaq muraty osy.