Saıasat Nurbektiń depýtattyq ókilettigi merziminen buryn toqtatyldy

NUR-SULTAN. QazAqparat – Búgin Parlament Májilisiniń jalpy otyrysynda depýtat Saıasat Nurbektiń ókilettigi merziminen buryn toqtatyldy, dep habarlaıdy QazAqparat tilshisi.

«QR Prezıdentiniń 2022 jylǵy 11 maýsymdaǵy Jarlyǵymen Parlament Májilisiniń depýtaty Saıasat Nurbek Ǵylym jáne joǵary bilim mınıstri laýazymyna taǵaıyndaldy. Osyǵan oraı Ortalyq saılaý komıssııasy sizderdiń nazarlaryńyzǵa Konstıtýtsııanyń 52-babyna, «Parlament jáne onyń depýtattarynyń mártebesi týraly» Zańnyń 24-baby 3 jáne 8-tarmaqtaryna sáıkes, Májilis depýtaty S.Nurbektiń ókilettigin merziminen buryn toqtatý týraly máseleni sheshý úshin usynym engizip otyr», - dedi Ortalyq saılaý komıssııasynyń múshesi Shavhat Ótemisov.

Jalpy otyrysta palata depýtattary atalǵan usynymǵa daýys berip, depýtattyń ókilettigin merziminen buryn toqtatý týraly sheshim qabyldady.

Budan buryn habarlanǵandaı, Saıasat Nurbek Ǵylym jáne joǵary bilim mınıstri laýazymyna taǵaıyndaldy.

Sonymen qatar ol Úkimet otyrysynda mınıstr retinde ant berdi.