Saıasat Nurbek: Prezıdenttik kadr rezerviniń maqsaty – úzdik jastardy irikteý

NUR-SULTAN. QazAqparat – Belgili saıasattanýshy, BTSDigital bilim berý jobalarynyń jetekshisi Saıasat Nurbek Prezıdenttik kadr rezerviniń artyqshylyqtary týraly aıtyp berdi, dep habarlaıdy QazAqparat tilshisi.

«Qazaqstanda ǵana emes, búkil álemde urpaqtar aýysyp jatyr. Kóptegen laýazymdy qyzmetke jas mamandar kelip jatyr. Máselen, Fınlıandııada Úkimet kabıneti músheleriniń, mınıstrlerdiń ortasha jasy – 32-35-te. Genderlik teńgerim de ózgerip keledi. Munyń basty sebebi – adamzat aldynda turǵan máselelerdiń sıpaty ózgerip keledi. Jańa problemalardy sheshý úshin eski tájirıbelerge súıene almaıtyn qubylys paıda boldy», - dedi Saıasat Nurbek QazAqparat tilshisine bergen suhbatynda.

Sonymen birge, spıker jańa jyldyń basynda júzege asyrylatyn iri jobanyń qanshalyqty mańyzdy ekenin atap ótti.

«Shyn máninde, Prezıdenttik kadr rezerviniń eń basty mindeti – týyndaǵan problemalarǵa jedel jaýap bere alatyn úzdik jastardy irikteý. Bul jańa qural emes, Qazaqstanda birneshe ret qoldanylǵan tásil. 90-shy jyldardy eske alsaq, elordamyz kóshken kezde ǵylymı qoǵamdastyqtan, isker jáne shyǵarmashylyq zııaly qaýymnan kóptegen jastar shaqyrtylǵan bolatyn. Endi bıýrokratııalyq apparatty jańartý mańyzdy. Sonymen qatar, Prezıdent jańa basqarýshylar júzege asyratyn kreatıvti, aıryqsha mindetterdi alǵa qoıyp otyr», - dedi sarapshy.

Aıta keteıik, búgin Ortalyq kommýnıkatsııalar qyzmetindegi baspasóz máslıhatynda QR Prezıdenti Ákimshiligi Basshysynyń orynbasary Máýlen Áshimbaev Prezıdenttik jastar kadr rezervine engen 300 qazaqstandyqtyń anyqtalǵanyn málimdedi. Jeńimpazdardyń ortasha jasy 31-de.

Joba jeńimpazdarynyń tolyq tizimin Prezıdenttik jastar kadr rezerviniń resmı saıtynan kórýge bolady.