Saıasat Nurbek kóne túrki dáýiriniń eskertkishterin ashqan ǵalymdardy marapattady

NUR-SULTAN. QazAqparat - Búgin QR Ǵylym jáne joǵary bilim mınıstri, Halyqaralyq Túrki akademııasy ǵylymı keńesiniń tóraǵasy Saıasat Nurbek buryn zerttelmegen kóne túrki eskertkishterin tapqan túrkolog ǵalymdardy marapattady, dep habarlaıdy QazAqparat.

QR Ǵylym jáne joǵary bilim mınıstrliginiń baspasóz qyzmetinen málim etkendeı, Mońǵolııanyń Ǵylym akademııasy Tarıh jáne arheologııa ınstıtýtynyń arheology A. Enhtórge, túrkolog ǵalymdar N. Bazylhan men N. Bógenbaevqa mınıstrliktiń «Ǵylymdy damytýǵa sińirgen eńbegi úshin» tósbelgisi tabystaldy. Sondaı-aq atalǵan ǵalymdarǵa jáne Halyqaralyq Túrki akademııasynyń prezıdenti Darhan Qydyrálige mınıstrdiń alǵys hattary berildi.

Mońǵolııanyń Nomgon óńirinde júrgizilgen ǵylymı arheologııalyq ekspedıtsııanyń nátıjeleri 24 tamyz kúni jarııalanǵan bolatyn. Ekspedıtsııany Halyqaralyq Túrki akademııasy men Mońǵolııa Ǵylym akademııasynyń Arheologııa ınstıtýty birlesip júrgizdi.

«Nomgondaǵy qazba jumystarynyń barysynda Ortalyq Azııadaǵy Shyǵys túrkileriniń qaǵan-knıaz tıpindegi memorıaldyq keshenderin ereksheleıtin negizgi arhıtektýralyq komponentterden turatyn túrki dáýiriniń buryn belgisiz bolǵan taǵy bir eskertkishi ashyldy. Kóne túrkilik rýna jáne soǵdy tilinde qashalǵan jazýy bar bitiktastyń bir bóligi, tasbaqa tuǵyry, antropomorfty bádiz bóligi (qaǵannyń jartylaı beınesi) jáne zoomorfty músinder (arystan men qoı músinderi) jáne taǵy basqasy tabyldy», - delingen mınıstrlik málimetinde.

Mınıstr Saıasat Nurbek bul jańalyqtyń mańyzdylyǵyn atap ótip, halyqaralyq ekspedıtsııa múshelerine túrkologııaǵa jáne álemdik ǵylymǵa qosqan úlesi úshin alǵys bildirgen.