Saıasat Nurbek Germanııanyń úzdik JOO-lar fılıalyn elimizde ashýdy usyndy

NUR-SULTAN. QazAqparat – Qazaqstan Germanııanyń jetekshi joǵary oqý oryndarynyń fılıaldaryn óz elimizde ashýǵa kómektesýge daıyn. Bul týraly Ǵylym jáne joǵary bilim mınıstri Saıasat Nurbek Qazaqstan-German qoǵamynyń tóraǵasy, Eurasian Management Solutions basqarýshy seriktesi Tomas Helmmen kezdesýinde aıtty, dep habarlaıdy QazAqparat.

Kezdesý barysynda qos eldiń bilim berý salasyndaǵy yntymaqtastyq joldary talqylandy. Mınıstr óz sózinde, eger Germanııa qyzyǵýshylyq tanytqan jaǵdaıda Qazaqstan atalǵan eldiń úzdik ýnıversıtetteriniń fılıaldaryn ashýǵa járdemdesýge daıyn ekendigin qýattady.

«Joǵary bilim berýdi reformalaý, ýnıversıtetterimizge akademııalyq jáne basqarýshylyq erkindik berý – álemniń úzdik ýnıversıtetterine Qazaqstanǵa jol ashady», – dedi Saıasat Nurbek.

T.Helmniń aıtýynsha, myńdaǵan qazaqstandyq Germanııa JOO-larynad bilip aldy.

«Búgingi tańda myńdaǵan qazaqstandyq stıpendıat Germanııanyń joǵary oqý oryndarynda bilim aldy. Olardyń basym kópshiligi Qazaqstan ekonomıkasynyń ıgiligine qyzmet etýde», - dedi Tomas Helm.

Mınıstrliktiń baspasóz habarlamasynda málim etilgendeı, Germanııanyń stıpendııalyq baǵdarlamalary ondaǵan jyldar boıy elimiz jastary arasynda suranysqa ıe. Olar stýdenttermen qatar, joǵary oqý ornynan keıingi bilim berýde keń aýqymdy jobalar usynady. Onyń ishinde ǵalymdar men oqytýshylarǵa arnalǵan stıpendııalyq zertteý baǵdarlamalary bar.