Saıasat Nurbek: Dıplom ıeleriniń jartysyna jýyǵy óz mamandyǵy boıynsha jumys istemeıdi

NUR-SULTAN. QazAqparat – Ulttyq qoǵamdyq senim keńesiniń alǵashqy otyrysynda sóz alǵan saıasattanýshy Saıasat Nurbek elde tıimsiz jumyspen qamtý beleń alǵanyn aıtty, dep habarlaıdy QazAqparat tilshisi.

«Bizdegi Bilim jáne ǵylym mınıstriligi men Eńbek jáne halyqty áleýmettik qorǵaý mınıstrligi adam kapıtalyn birlesip damyta almaı otyr. Birinshi másele – bilimge degen jappaı suranys joq. Jalpy ishki ónimniń túsip ketkenine qaramastan, bizde tıimsiz jumys oryndary saqtalýda. Bilim berý júıesi bilim ekonomıkasynyń mamandaryn áli kúnge daıyndamaı otyr. Joǵary bilimniń buqaralyq sıpat alyp ketkenin Qasym-Jomart Kemeluly óziniń Joldaýynda da kóterdi. Joǵary bilimniń bul máselesine endi ǵana júıeli qarap jatyrmyz. Sóıte tura, bilim berý júıesi bızneske qulaq aspaıdy. Jumys berýshilerdiń 91 paıyzy túlekterdiń praktıkalyq bilimi men mashyǵy joq ekenin aıtýda. Dıplom ıeleriniń jartysyna jýyǵy óz mamandyǵy boıynsha jumys istemeıdi. 25 jastan keıin bizdiń adamdar bilim alýdy toqtatady. Biliktiligin arttyrýǵa zer salmaıdy. «Eńbek kedeıligi» degen túsinik qalyptasty. Mysaly, bizde dáriger men kólik júrgizýshisiniń aılyqtaryndaǵy aıyrmashylyq 20 paıyzdan aspaıdy. Al AQSh-ta bul kórsetkish - 260 paıyz, Germanııada 174 paıyz, Brazılııada 172 paıyz. Osylaısha, neǵurlym joǵary bilikti, shyǵyny eleýli mamandyqtarǵa suranys baıqalmaı otyr. Bul óte kúrdeli problema», - dedi Saıasat Nurbek.