Saıasat Nurbek bıznestiń betin ǵylymǵa qalaı buratynyn aıtty

ASTANA. QazAqparat – Ǵylym jáne joǵary bilim mınıstri Saıasat Nurbek Jibek Joly telearnasyna bergen suhbatynda ǵylym men óndiristiń yntymaǵyn tereńdetý úshin kásiporyndarǵa salyq júıesindegi «sýper shegerimder» tetigin usynýdy josparlap otyrǵanyn aıtty, dep habarlaıdy QazAqparat tilshisi.

Suhbat barysynda ol ǵalymdardy áleýmettik turǵyda qoldaý sharalary qalaı iske asyp jatqanyn baıandady.

«Ǵylym jáne joǵary bilim mınıstrligi qurylmaı turyp, alty aı buryn ǵalymdardyń áleýmettik paketin óte jaqsy kúsheıttik. Ǵalymdardyń el boıynsha ortasha aılyǵy eki ese ósti – 152 myń teńgeden 272 myń teńgege deıin artty. Munyń ózi jaman emes. Byltyrǵy qyrkúıekten beri eldegi irgeli ǵylymmen aınalysatyn 11 ǵylymı ınstıtýttaǵy 1200 jetekshi ǵalymnyń aılyǵyn bazalyq qarjylandyrýdan tikeleı qarjylandyrýǵa aýystyrdyq. Aldaǵy úsh jylda ǵylymdy damytýǵa bólinetin qarajat 3,5 arttyryldy. Buǵan deıin úsh jylda bir ret nemese arakidik bólinip kelgen granttar jyl saıyn tolyǵymen jańaryp otyrady. 1114 jas ǵalymǵa jeke kóńil bólinip, jeke granttar berildi. Byltyrdan beri ǵylymı zertteýlerdi jalǵastyrý úshin «Jas ǵalym» grantyn berip bastadyq. Onyń mólsherin aıyna 500 myń teńge dep belgiledik. Óıtkeni, jas ǵalymdar qalaı tirshilik etem dep, nesıeni qalaı tóleımin dep oılamaı, ǵylymmen ǵana shuǵyldanýy kerek», - dedi mınıstr.

Sondaı-aq, ol bıyl «Ǵylym jáne tehnologııalyq saıasat týraly» jańa zań qabyldanatynyn eske saldy.

«Biz alǵash ret Salyq kodeksi men Bıýdjet kodeksine, Investıtsııalyq kodekske kirip otyrmyz. Ondaǵy oıymyz óte qarapaıym. Bul halyqaralyq tájirıbede, jyldam damyp kele jatqan elderdiń bárinde baıaǵydan qoldanylyp keledi. Bul – salyq júıesindegi «sýper shegerimder» tetigi. Bızneske, kompanııalarǵa, ónerkásipke ǵylymı ázirlemelermen aınalysý tıimdi bolatyndaı, ǵylymı mazmuny basym ónim shyǵarý tıimdi bolatyndaı, qosylǵan qun tizbegine ený tıimdi bolatyndaı jaǵdaı jasalady degen sóz. Bul «Ǵylym jáne tehnologııalyq saıasat týraly» jańa zańnyń sulbasynda qazirdiń ózinde tóselgen. Bıyl osy zańdy qabyldaýymyz kerek. Sol zańda bıznestiń betin ǵylymǵa burý mindeti, ǵylymdy bıznestiń suranysyna saı bolatyndaı etip daıyndaý mindeti, ony jetkilikti qarjymen, tehnologııalyq quraldarmen qarýlandyrý mindeti júktelip otyr. Sondyqtan, bizdegi tehnologııalyq zerthanalardyń bárin qaıta jabdyqtaýdy bastap, ulttyq salalyq ujymdyq zerthanalardy qalyptastyrý tsıklin aıaqtap jatyrmyz», - dedi Saıasat Nurbek.