Saıahatshy: Atyraý – munaıly, baı ólke, biraq joly byt-shyt

ATYRAÝ. QazAqparat – Atyraý – munaıly, baı ólke, biraq joly – byt-shyt, túıir-túıir tas, tozǵan asfalt. Egde jastaǵy saıahatshy Atyraý oblysyndaǵy joldyń nasharlyǵyna qynjylys bildirdi, dep habarlaıdy QazAqparat tilshisi.

Sársenbaı Qotyrashov Atyraý oblysyndaǵy joldyń nasharlyǵy týraly áleýmettik jelidegi paraqshasynda aıtty.

«Atyraý – munaıly ólke, baı ólke. Áttegen-aı, sondaı baılyqtyń ústinde turyp, joldyń sıqy mynaý – byt-shyt, túıir-túıir tas, tozǵan asfalt. Mashına qatty júrip ótkende, ushqan tas súıegińdi syndyryp jibere jazdaıdy. Shirkin-aı, osyndaı baılyqty halyqtyń ıgiligine jaratyp, myna asfaltty jolyn jóndep salsa, el rıza bolyp, Úkimet basshysyn, depýtattardy maqtaǵan bolar edi. Sondaı maqtaýǵa ıe bolatyndaı dárejede halyqqa ıgilikti is jasasa dep tileımin», - dedi pikir bildirdi Sársenbaı Qotyrashov.

Qazaq qarııasy álem elderine jaıaý saıahattaý úshin Atyraýdan 2 tamyzda jolǵa shyqty. Onyń sapary úsh kezeńge bólingen. Alǵashqy marshrýty – Qazaqstan, Reseı, Grýzııa, Túrkııa elderine jetý. Bul elderdi aralaý úshin 100 kúnde 3 myń shaqyrymǵa jýyq jol júredi.

Budan soń 180 kúnde 9 shaqyrym jol júrip, Túrkııa, Frantsııa, AQSh elderine barady. Al 130 kúnge sozylatyn úshinshi kezeńdi AQSh-tan bastaıdy. Qytaı, Mońǵolııa, Reseı arqyly 4 myń shaqyrymdy artqa tastap, Qazaqstanǵa oralady.

Jaıaý saparyn 2025 jylǵy tamyzda aıaqtaıtyn Sársenbaı Qotyrashov eki jylda 16 210 shaqyrym jol júredi.

Ol búgin, 8 tamyzda Qazaqstan – Reseı shekarasyna jetti.

«Mine, shekaraǵa jettim. Birinshi shekaradan ótkeli turmyn. Atyraýdan 300 shaqyrymnan astam jaıaý júrdim. Joldyń keıbir jeri nashar, keıbir tusy jaqsy. Jol salynyp jatyr. Kelesi jylǵa deıin bitetin shyǵar. Búgin mine, birinshi ret shekarany kórip, qobaljyp turmyn. Alla sátin salsa, ótermin, saý bolyńyzdar, qazaqstandyqtar», - dedi Sársenbaı Qotyrashov.

Eske sala ketelik, budan buryn 73 jastaǵy aqsaqal álem elderin jaıaý aralaýǵa Atyraýdan jolǵa shyqqanyn habarlaǵan edik.