Saıabek Zııadın: Elbasy bastamasy - damyǵan elderdiń qataryna umtylǵan ekonomıkalyq qadam

ALMATY. QazAqparat - «Prezıdenttiń bes áleýmettik bastamasy» jastardyń úmitin oıatty, deıdi Ál-Farabı atyndaǵy qazaq ulttyq ýnıversıteti Ekonomıka zertteý ortalyǵynyń dırektory, ekonomıka ǵylymdarynyń doktory, professor Saıabek Zııadın.

«Prezıdenttiń bes áleýmettik bastamasyndaǵy» birinshi bastama - «Árbir otbasyna baspana alýdyń jańa múmkindikterin berý»  jastardyń úmitin ulǵaıtty. Nesıelendirýdi ártaraptandyrýdyń negizgi tetigi bolyp sanalatyn ıpoteka máselesi halyqty turǵyn úımen qamtamasyz etýde úlken oryn alatyny ras. Álemdegi eń tómengi ıpoteka beretin bes memleket bar: Japonııa 1,68 %, Shveıtsarııa 1,75%, Fınlıandııa 1,83%, Germanııa 1,90%, Lıýksembýrg 2,0%. Bul memlekettiń kisi basyna tabysy da bizdiń memleketpen qaraǵanda anaǵurlym joǵary.  Japonııada ıpoteka 10 paıyzdyq bastapqy jarnamen 35 jylǵa deıin beriledi. Japonııada ınflııatsııa deńgeıi noldiń aınalasynda bolǵanyn eskersek, paıyzdyq mólsherlemesi óte oryndy dep esepteýge bolady», - deıdi professor.

Qazaqstandaǵy qarjylyq jaǵdaıdy eskersek, jıyrma bes jylda ınflııatsııa deńgeıi qandaı bolmaq? Ekonomıka ǵylymdarynyń doktory sony da retteıtin memlekettik mehanızmder qatar oryndalýy tıis dep sanaıdy.

«Bul jerde nesıe berýshi bankter de utylmaýy kerek. Elbasynyń bul bastamasy - elimizdiń osyndaı alpaýyt memleketteriniń qatarynan kórinýge degen qaryshty ekonomıkalyq qadamy. 30 damyǵan memlekettiń basty nyshandarynyń biri memlekettiń halyqtyń áleýmettik jaǵdaıyn jetildirýdegi róli. Bul áleýmettik qadam sonyń aıqyn aıǵaǵy», - dedi ǵalym Saıabek Zııadın.

Foto: kazguiu.kz