Saverdın Imırov: Qańtar oqıǵasy Ulttyq ulannyń shuǵyl mindetterdi oryndaýǵa daıyn ekenin kórsetti
«Parlament Májilisiniń jalpy otyrysynda kúsh qurylymdary basshylarynyń esepteri tyńdaldy. Prezıdenttiń kezekti Joldaýynyń qarsańynda osyndaı sharanyń bolǵany óte mańyzdy dep oılaımyn. Qoǵam da qańtar oqıǵasyna baılanysty kókeıindegi suraqtardyń keıbirine jaýap aldy. Ulttyq ulanǵa kelsek, táýelsizdik alǵan kezden beri qoǵamdyq qaýipsizdikti kúzetip kelemiz. 30 jyldyń ishinde Ulttyq ulannyń jeke quramyna halyq tarapynan, qoǵam tarapynan, memleket tarapynan eshqandaı shaǵym aıtylyp kórgen joq. Іshki ister organdarymen birge qoǵamdyq qaýipsizdikti qamtamasyz etetin áskerı vedomstvo bolǵandyqtan, qańtardaǵy jappaı tártipsizdik kezinde birinshi bolyp oqıǵa ornyna bardyq», - deıdi Saverdın Imırov.
Sondaı-aq, ol Prezıdent Qasym-Jomart Toqaevtyń Ulttyq ulannyń qabiletin jetildirý boıynsha naqty tapsyrmalar bergenin eske saldy.
«Ulttyq ulannyń jeke quramy árdaıym aıaq astynan paıda bolatyn shuǵyl mindetterdi oryndaýǵa daıyn ekenin qańtar oqıǵasy taǵy kórsetti. Buǵan deıin Qordaı oqıǵasy kezinde de, basqa óńirlerde de eldiń tynyshtyǵyn qorǵaý, aýhaldy turaqtandyrý úshin senimdi qyzmet etken bolatynbyz. Bul joly ásirese Almaty qalasynda Ulttyq ulannyń jeke quramy ishki ister organdarymen birge mindetin múltiksiz oryndap, senip tapsyrylǵan nysandardyń qorǵap qaldy, bir de bir nysandy tastap ketken joq. Búginde úlken jumys júrgizip jatyrmyz. Prezıdent Ulttyq ulandy sandyq, sapalyq turǵydan nyǵaıtý kerektigin aıtqanyn bilesizder. Ol Ulttyq ulannyń áreketine joǵary baǵa berip, memleket pen qoǵamnyń qaýipsizdigin qorǵaýǵa qabiletti organ ekenin aıtty», - deıdi Ulttyq ulan áskerı keńesiniń hatshysy.
Onyń paıymynsha el basshylyǵynyń sol kezde utymdy sheshim qabyldaýy turaqtylyqtyń jyldam qalpyna kelýine áser etken.
«Memleket basshysy qańtar oqıǵasy kezinde óte naqty, batyl sharalar qabyldaı bildi. Sonyń arqasynda turaqtylyq qalpyna keldi. Májilistiń búgingi jalpy otyrysynda Bas prokýror da, Іshki ister mınıstri de, Qorǵanys mınıstri de destrýktıvti kúshterdiń uıymdasqan túrde áreket etkenin rastady. Bizdiń «Ulttyq ulan – birtutastas jaýyngerler januıasy. Artymyzda halyq, artymyzda elimiz» degen uranymyz bar. Qańtar oqıǵasy kezinde osy uranǵa saı áreket ettik», - dedi Saverdın Imırov.